Тошкентда 10 туман ҳокимига нисбатан текширув бошланди

Тошкент, Ўзбекистон (UzDaily.uz) — Тошкент шаҳар ҳокимлиги пойтахтнинг ўн икки туманидан ўнтаси ҳокимларига нисбатан хизмат текширувини бошлади. Бу ҳақда шаҳар ҳокими Шавкат Умурзаковнинг E-qaror порталида эълон қилинган фармойишида маълум қилинган.

Хизмат текширувини ўтказишга 22 июль куни Коррупцияга қарши курашиш агентлиги томонидан киритилган тақдимнома асос бўлган.

Текширув Олмазор, Бектемир, Мирабод, Мирзо Улуғбек, Сергели, Учтепа, Чилонзор, Шайхонтоҳур, Юнусобод ва Яшнобод туманлари ҳокимларини қамраб олади.

Хизмат текширувини ўтказиш беш нафардан иборат комиссияга топширилди. Комиссияга Тошкент шаҳар ҳокимлиги комплаенс ва ички коррупцияга қарши назорат хизмати бошлиғи Шуҳрат Турдиқулов раҳбарлик қилади.

Комиссия таркибига, шунингдек, шаҳар ҳокими аппарати раҳбари Шаҳрух Мамаданов, ҳокимликнинг ташкилий-кадрлар гуруҳи раҳбари Хондамир Тургунов, юридик бошқарма бошлиғи Маҳкам Ваҳидов ҳамда мурожаатлар билан ишлаш бўлими бош мутахассиси Нигора Сабитова киритилган.

Фармойишга кўра, комиссияга хизмат текширувини холис ва ҳар томонлама ўтказиш ҳамда унинг якунлари бўйича тегишли хулосалар тайёрлаш вазифаси юклатилган.

Зарурат туғилганда, текширувга тегишли давлат органларининг соҳавий мутахассислари ҳам жалб қилиниши мумкин.