Афғонистон Ўзбекистон ва минтақадаги бошқа давлатларда транспорт атташеларини тайинлайди

Тошкент, Ўзбекистон (UzDaily.uz) — Афғонистон Транспорт ва фуқаро авиацияси вазирлиги қўшни ҳамда минтақавий давлатларда транспорт атташеларини тайинлаш режаси ҳақида эълон қилди.

ОАВ хабарларига кўра, янги вакиллар Ўзбекистон, Эрон, Покистон, Туркманистон ва Тожикистонда фаолият юритади.

Афғон томони маълумотларига кўра, мазкур ташаббуснинг асосий мақсади савдони ривожлантириш, транзит жараёнларини соддалаштириш ҳамда афғон тадбиркорлари учун халқаро бозорларда кенгроқ имкониятлар яратишдан иборат.

Афғонистон импорт ва экспортни таъминлашда асосан қўшни давлатлар орқали амалга ошириладиган автомобиль ташувларига катта даражада боғлиқ.

Шу муносабат билан савдо коридорлари ва минтақавий келишувлар мамлакатнинг жаҳон иқтисодиётига интеграцияси ҳамда экспорт салоҳиятини оширишнинг муҳим воситаси сифатида кўрилмоқда.