Toshkent, O’zbekiston (UzDaily.uz) — “O‘zbekneftegaz” AJ kompaniyani moliyaviy sog‘lomlashtirish dasturi doirasida kredit portfelini optimallashtirishni davom ettirmoqda. 2026 yilning to‘qqiz oyida jamiyat 384 mln dollarlik kreditlarni qayta moliyalashtirdi va muddatidan oldin so‘ndirdi. Bu foiz xarajatlarini kamaytirish imkonini berdi.
Kompaniyaning asosiy vazifasi yuqori foiz stavkalari bo‘yicha amaldagi kreditlarni yangi qarz yukini oshirmagan holda yana-da qulay shartlarda qayta moliyalashtirishdan iborat.
Shu bilan birga, “O‘zbekneftegaz” davlat kafolatlari asosida jalb qilingan kreditlar ulushini bosqichma-bosqich qisqartirishni rejalashtirmoqda.
Ayni paytda kompaniyada 69 ta kredit kelishuvi mavjud. To‘qqiz oy davomida 41 ta kredit shartnomasi qayta moliyalashtirildi va to‘liq muddatidan oldin so‘ndirildi.
Kompaniya bahosiga ko‘ra, agar ushbu choralar amalga oshirilmaganida, qo‘shimcha foiz xarajatlari 18 mln dollarni tashkil etgan bo‘lar edi.
Mahalliy banklar kreditlari bo‘yicha o‘rtacha foiz stavkalari yillik 9,5–12 foizdan 7,4–7,5 foizgacha pasaytirildi. Natijada kompaniyaning to‘qqiz oylik kredit yuki birinchi marta 3,1 foizdan 2,2 foizgacha kamaydi.
“O‘zbekneftegaz” keyingi ustuvor yo‘nalish sifatida davlat kafolatlari asosida jalb qilingan umumiy qiymati 1,1 mlrd dollarlik yirik kreditlarni qayta moliyalashtirishni belgiladi.
Birinchi yo‘nalish doirasida kompaniya qoldiq qarzdorligi 260 mln dollarni tashkil etuvchi kreditni qayta moliyalashtirishni rejalashtirmoqda. Ushbu kredit bo‘yicha foiz stavkasi yillik o‘zgaruvchan 5 foizdan qatʼiy 3,75 foizgacha pasaytiriladi.
Qatʼiy foiz stavkasiga o‘tish xalqaro moliya bozorlarida foiz stavkalari o‘zgarishi ehtimoli bilan bog‘liq xatarlarni ham kamaytirish imkonini beradi.
Qayta moliyalashtirish natijasida 260 mln dollargacha bo‘lgan summa uchun davlat kafolatini bekor qilish kutilmoqda.
Ushbu operatsiyaning iqtisodiy samarasi 5 mln dollargacha baholanmoqda.
Ikkinchi yo‘nalish «Uzbekistan GTL» loyihasi doirasida davlat kafolatlari asosida jalb qilingan kreditlar bilan bog‘liq. Ushbu kreditlar bo‘yicha asosiy qarz qoldig‘i 840 mln dollarni tashkil etadi.
So‘nggi uch oy davomida “O‘zbekneftegaz” xalqaro banklar bilan muzokaralar o‘tkazib, kompaniya eng maqbul deb hisoblagan moliyalashtirish shartlarini tanladi.
Rejaga ko‘ra, kreditlar to‘rt yil muddatga yillik 3,8 foizlik qatʼiy stavka bo‘yicha qayta moliyalashtiriladi.
O‘zgaruvchan foiz stavkasi bo‘yicha amaldagi kreditlarning o‘rtacha foiz stavkasi 7,7 foizni tashkil etadi.
Qayta moliyalashtirishdan so‘ng 840 mln dollargacha bo‘lgan summa uchun davlat kafolati bekor qilinadi. Kompaniya, shuningdek, foiz va boshqa moliyaviy xarajatlarni optimallashtirishni kutmoqda.
Ushbu yo‘nalishdan kutilayotgan iqtisodiy samara 60 mln dollargacha baholanmoqda. Bundan tashqari, qatʼiy foiz stavkasi keyingi yillarda qarz olish qiymatining oshishi ehtimoli bilan bog‘liq xatarlarni bartaraf etish imkonini beradi.
Shu tariqa, qayta moliyalashtirish bo‘yicha ikkita ustuvor operatsiyadan olinadigan umumiy iqtisodiy samara kompaniya tomonidan 65 mln dollargacha baholanmoqda.
“O‘zbekneftegaz” kredit portfelini optimallashtirish, moliyalashtirish xarajatlarini kamaytirish va moliyaviy barqarorlikni mustahkamlashni davom ettirish niyatida. Kompaniya, shuningdek, ushbu choralarni o‘zining investitsiyaviy jozibadorligini oshirish bilan bog‘lamoqda.
