O‘zbekistonda giyohvandlikka qarshi yangi reydlar o‘tkazildi

Toshkent, O’zbekiston (UzDaily.uz) — Davlat xavfsizlik xizmati va Ichki ishlar vazirligi xodimlari «Xavfsiz va sog‘lom mamlakat» tezkor-profilaktik tadbirlari doirasida O‘zbekistonning bir qator hududlarida giyohvand moddalarning noqonuniy aylanmasiga chek qo‘yishga qaratilgan maxsus operatsiyalarni o‘tkazdi.

Namangan viloyatining Norin tumanida 1961 yilda tug‘ilgan mahalliy fuqaroning uyi ko‘zdan kechirilganda, huquqni muhofaza qiluvchi organlar tomonidan 1 kg 595 gramm marixuana aniqlanib, musodara qilindi. Tergov maʼlumotlariga ko‘ra, giyohvand modda keyinchalik sotish maqsadida saqlangan.

Yana bir holat Namangan viloyatining Chortoq tumanida aniqlandi. U yerda 1973 yilda tug‘ilgan erkak o‘z tomorqasida keyinchalik sotish maqsadida 839 tup kannabis yetishtirgan.

Samarqand viloyatining Tayloq tumanida Urgut tumanida yashovchi, 1995 yilda tug‘ilgan fuqaroning avtomashinasi tekshirilganda, undan 20 gramm geroin aniqlanib, musodara qilindi.

Xorazm viloyatida giyohvand moddalarning noqonuniy aylanmasi bilan bog‘liq jinoyat uchun avval sudlangan Qo‘shko‘pir tumanida yashovchi, 1962 yilda tug‘ilgan fuqaro 36 tup kannabis yetishtirgani maʼlum bo‘ldi.

Toshkent viloyatining Yangiyo‘l shahrida ham xuddi shunday jinoyat uchun avval sudlangan, 1973 yilda tug‘ilgan yana bir fuqaro o‘z xonadoni hududida issiqxona tashkil qilib, unda 22 tup kannabis parvarishlagan.

Shunga o‘xshash holat Andijon viloyatining Qo‘rg‘ontepa tumanida ham qayd etildi. U yerda 1965 yilda tug‘ilgan mahalliy fuqaro o‘z tomorqasida 10 tup kannabis yetishtirgan.

Aniqlangan barcha holatlar yuzasidan tergovga qadar tekshiruv ishlari olib borilmoqda.