O‘zbekiston va YUNISEF ijtimoiy himoya strategiyasini muhokama qildi
Toshkent, O’zbekiston (UzDaily.uz) — 3 sentyabr kuni O‘zbekiston Iqtisodiyot va moliya vazirligida vazir o‘rinbosari Otabek Fazilkarimovning YUNISEF vakillari bilan uchrashuvi bo‘lib o‘tdi. Uchrashuv mamlakatning Moslashuvchan ijtimoiy himoya strategiyasini ishlab chiqish masalalariga bag‘ishlandi.
Muhokamada Jahon banki va Ijtimoiy himoya milliy agentligi vakillari, shuningdek, xalqaro va milliy maslahatchilar ham ishtirok etdi.
Ishtirokchilar mamlakatning iqlimiy, tabiiy va iqtisodiy xatarlarini hisobga olgan holda aholiga ijtimoiy ko‘mak ko‘rsatish mexanizmlarini takomillashtirishni nazarda tutuvchi strategiyani tayyorlashning asosiy yondashuvlarini ko‘rib chiqdi.
Uy xo‘jaliklarining turli xavf-xatarlarga chidamliligini oshirish hamda ijtimoiy yordamni o‘z vaqtida ko‘rsatish mexanizmlarini takomillashtirishga alohida eʼtibor qaratildi. Tomonlar, shuningdek, moslashuvchan ijtimoiy himoya sohasida idoralararo hamkorlikni rivojlantirish masalasini muhokama qildi.
Uchrashuv davomida hujjat ustida ishlashning keyingi yo‘nalishlari belgilandi. Xususan, manfaatdor tomonlar bilan maslahatlashuvlar o‘tkazish va xalqaro tajribani o‘rganish rejalashtirilmoqda.
Bundan tashqari, O‘zbekistonda alohida eʼtibor qaratishni talab qiladigan favqulodda vaziyatlar, shuningdek, tabiiy va iqlimiy xatarlarni hamda ularga javob qaytarishning tegishli mexanizmlarini aniqlash vazifasi belgilandi.
Uchrashuv yakunlari bo‘yicha tomonlar Moslashuvchan ijtimoiy himoya strategiyasi ustidagi qo‘shma ishlarni davom ettirish va aholini ijtimoiy qo‘llab-quvvatlash mexanizmlarini yana-da takomillashtirishga kelishib oldi.
