Toshkent, O’zbekiston (UzDaily.uz) — Amerikalik bloger Jimmi Donaldson, MrBeast nomi bilan mashhur, ilk bor Markaziy Osiyoga tashrif buyuradi. Safar doirasida u Toshkentda bo‘lib, muxlislari bilan ommaviy uchrashuv o‘tkazadi. Bu haqda tashrifni tashkil etayotgan O‘zbekiston Madaniyat va sanʼatni rivojlantirish jamg‘armasi (ACDF) matbuot xizmati xabar berdi.
Donaldson YouTube platformasidagi eng mashhur kontent yaratuvchilardan biri hisoblanadi. Uning kanallariga 500 milliondan ortiq foydalanuvchi obuna bo‘lgan. U katta byudjetlar, murakkab sahnalashtirishlar va yirik sovrin jamg‘armalari bilan ajralib turadigan masshtabli videoloyihalari orqali mashhurlikka erishgan.
Ko‘ngilochar kontentdan tashqari, MrBeast xayriya loyihalarini ham rivojlantirmoqda. Xususan, uning Beast Philanthropy kanali ochlikka qarshi kurashish, toza ichimlik suvidan foydalanish imkoniyatini taʼminlash, tibbiy yordam ko‘rsatish, bolalar va oilalarni qo‘llab-quvvatlash, shuningdek, ekologik loyihalarga bag‘ishlangan.
Toshkentdagi ommaviy uchrashuv interaktiv formatda o‘tkaziladi. Ishtirokchilar uchun o‘yinlar va MrBeast haqida kam maʼlum bo‘lgan faktlarga bag‘ishlangan viktorina tayyorlangan. G‘oliblarga sovrinlar topshiriladi.
Joylar soni cheklangan bo‘ladi. Ishtirokchilar ro‘yxatdan o‘tganlar orasidan tasodifiy sonlar generatori yordamida tasodifiy tarzda tanlab olinadi. Ro‘yxatdan o‘tish va tadbirda ishtirok etish bepul.
ACDF mashhur blogerning tashrifi O‘zbekistondagi YouTube hamjamiyatini yana-da rivojlantirishga ko‘maklashishi va mahalliy kontent yaratuvchilarga xalqaro media makonida o‘z ishtirokini kengaytirish imkonini berishini kutmoqda. Jamg‘arma, shuningdek, tadbirni mahalliy videoprodakshenni rivojlantirish va blogingni brendlar hamda investorlar uchun qiziqish uyg‘otadigan mustaqil biznes yo‘nalishi sifatida ilgari surish bilan bog‘lamoqda.
Tashrif kreativ iqtisodiyotning rolini oshirish, yoshlar tashabbuslari va raqamli industriyalarni qo‘llab-quvvatlash, shuningdek, xalqaro media texnologiyalarini mintaqaga transfer qilishga qaratilgan davlat dasturi doirasida amalga oshirilmoqda.
Uchrashuvga ro‘yxatdan o‘tish bepul va faqat ACDF rasmiy havolasi orqali amalga oshirilishi mumkin. Tadbirda 18 yoshdan katta shaxslar ishtirok etishi mumkin. Bir shaxsdan faqat bitta ariza qabul qilinadi.
Ro‘yxatdan o‘tishda ism, amaldagi telefon raqami va shaxsni tasdiqlovchi hujjat maʼlumotlarini ko‘rsatish zarur.
Arizalarni qabul qilish yakunlanganidan so‘ng jamg‘arma belgilangan talablarga javob beradigan ishtirokchilar orasidan tasodifiy tanlov o‘tkazadi. Tanlab olingan nomzodlar bilan to‘g‘ridan-to‘g‘ri va maxfiy tarzda bog‘lanilib, uchrashuv sanasi va o‘tkaziladigan joy haqida xabar beriladi. Ishtirokchilarning ismlari eʼlon qilinmaydi.
ACDF ehtimoliy firibgarlik sxemalari haqida alohida ogohlantirdi. Jamg‘arma tadbirda ishtirok etish uchun to‘lov, bank kartalari maʼlumotlari yoki parollarni so‘ramaydi. Foydalanuvchilarga uchinchi tomon havolalariga o‘tmaslik va tadbirga kirishni taklif qiladigan yoki o‘zini MrBeast yoki uning vakillari sifatida tanishtiradigan akkauntlar hamda turli sovrinli o‘yinlarga ishonmaslik tavsiya etildi.
