Ekstremistik jinoyatda ayblangan erkak Polshadan ekstraditsiya qilindi

Toshkent, O’zbekiston (UzDaily.uz) — Polsha davlatidan O‘zbekistonga ekstremistik yo‘nalishdagi jinoyat sodir etganlikda ayblanayotgan va xalqaro qidiruvda bo‘lgan shaxs ekstraditsiya qilindi. Bu haqda O‘zbekiston Respublikasi Interpol Milliy markaziy byurosi maʼlum qildi.

Idora maʼlumotiga ko‘ra, O‘zbekiston Jinoyat kodeksining 244-2-moddasi birinchi qismi bilan jinoyat ishi qo‘zg‘atilganidan so‘ng, ayblanuvchi mamlakatni tark etgan va uzoq vaqt davomida xorijda yashirinib yurgan. Shu munosabat bilan u Interpol kanallari orqali xalqaro qidiruvga berilgan.

Qidiruvda bo‘lgan shaxsning joylashgan manzili Toshkent va Varshava Interpol Milliy markaziy byurolari o‘rtasidagi hamkorlik natijasida aniqlangan. Operatsiyada O‘zbekistonning Polshadagi elchixonasi vakili ham ishtirok etgan.

Ekstraditsiya jarayoni yakunlanganidan so‘ng, gumonlanuvchi O‘zbekiston Interpol Milliy markaziy byurosi xodimlariga topshirilgan.

Idora taʼkidlashicha, ekstraditsiya ikki davlat vakolatli organlarining xalqaro politsiya hamkorligi va jinoiy taʼqibdan yashirinayotgan shaxslarni qidirish sohasidagi hamkorligi natijasidir.

O‘zbekiston Interpol Milliy markaziy byurosi mamlakat tashqarisida yashirinish jinoiy javobgarlikdan ozod qilmasligini qayd etdi. Shuningdek, huquqni muhofaza qiluvchi organlarning xalqaro hamkorligi qidiruvdagi shaxslarni aniqlash, ushlash va O‘zbekiston Respublikasi qonunchiligiga muvofiq javobgarlikka tortish uchun qaytarish imkonini berishi taʼkidlandi.