Тошкент, Ўзбекистон (UzDaily.uz) — Ўзбекистон биринчи хоними Зироат Мирзиёева Ўзбекистон Президенти Шавкат Мирзиёевнинг Жанубий Кореяга давлат ташрифи доирасида Корея Республикаси биринчи хоними Ким Хе Гён ҳамроҳлигида Корея Миллий сарой музейига ташриф буюрди.
Музей экспозицияси беш асрдан ортиқ вақт давомида Корея тарихида алоҳида ўрин эгаллаган Чосон сулоласининг кўп асрлик тарихи ва маданий меросига бағишланган.
Зироат Мирзиёевага сулола вакилларига тегишли қадимий қўлёзмалар ва шеърий асарлар, анъанавий либослар ҳамда сарой маданиятига оид бошқа буюмлар намойиш этилди. Экспонатлар ўша давр турмуш тарзи, анъаналари ва бадиий меросининг ўзига хос хусусиятларини акс эттиради.
Музейга ташрифдан сўнг Зироат Мирзиёева ва Ким Хе Гён икки томонлама учрашув ўтказди.
Суҳбат давомида Ўзбекистон ва Корея халқларининг кўп йиллик дўстлик, ўзаро ҳурмат ва маданий муштаракликка асосланган яқинлиги қайд этилди.
