Тошкент, Ўзбекистон (UzDaily.uz) — Тошкент вилояти ҳокими Зоир Мирзаев бошчилигидаги делегация Хитойга амалий ташриф доирасида Sinoma International Engineering Co., Ltd. компанияси билан ҳудудда саноат лойиҳаларини амалга ошириш истиқболларини муҳокама қилди. Бу ҳақда Тошкент вилояти ҳокимлиги матбуот хизмати хабар берди.
Ташрифнинг биринчи куни Пекин шаҳрида вилоят вакиллари қурилиш материаллари ишлаб чиқариш ва саноат инжинирингига ихтисослашган Хитой компанияси раҳбарияти билан учрашди.
Томонлар Тошкент вилоятида замонавий ишлаб чиқариш қувватларини яратиш, қурилиш материаллари саноатини ривожлантириш, саноат корхоналарини технологик модернизация қилиш ва илғор муҳандислик ечимларини жорий этиш масалаларини муҳокама қилди.
Sinoma International Engineering цемент ва тоғ-кон саноати учун EPC тамойили асосида комплекс лойиҳаларни амалга оширади. Компания, шунингдек, ишлаб чиқариш линиялари учун юқори технологияли ускуналар, жумладан, айланма печлар ва майдалагичлар ишлаб чиқаради.
Ҳозирги вақтда компания фаолияти анъанавий саноат йўналишларидан ташқарига ҳам чиқмоқда. Sinoma International Engineering қайта тикланувчи энергетика, атроф-муҳитни муҳофаза қилиш, рақамли технологиялар ва сунъий интеллект асосидаги бошқарув тизимлари соҳаларида ҳам лойиҳаларни ривожлантирмоқда.
Компания дунёдаги 70 дан ортиқ мамлакатда 1 мингдан зиёд лойиҳани амалга оширган.
2025 йил якунларига кўра, Sinoma International Engineering компаниясининг тушуми 73,27 млрд доллар, соф фойдаси 4,23 млрд доллар, жами активлари эса 91,65 млрд долларни ташкил этган.
Музокаралардан сўнг Тошкент вилояти делегацияси Хитой компанияси фаолияти, унинг инжиниринг ишланмалари, ишлаб чиқариш технологиялари ва юқори технологияли ускуналари, шунингдек, замонавий саноат лойиҳаларини амалга ошириш тажрибаси билан танишди.
Учрашув якунлари бўйича томонлар Тошкент вилоятининг саноат салоҳияти ва инвестиция имкониятларини инобатга олган ҳолда қурилиш материаллари ишлаб чиқариш, саноат инжиниринги, замонавий технологиялар ва истиқболли ишлаб чиқариш соҳаларидаги лойиҳаларни биргаликда ўрганишга келишиб олди.
Томонлар танлаб олинган лойиҳаларни амалга оширишнинг амалий босқичига ўтказиш ниятида.
