Андижонда АГТКСда газ баллони портлади

Тошкент, Ўзбекистон (UzDaily.uz) — Андижонда автомобильга метан ёқилғиси қуйиш жараёнида автомобиль газ тўлдириш компрессор станциясида (АГТКС) газ баллони портлади. Ҳодиса 5 сентябрь куни соат тахминан 11:15 да «Андижон» маҳалласида содир бўлган.

Дастлабки маълумотларга кўра, «Spark» автомобилига ўрнатилган баллон портлаган. Автомобилнинг асосий шикастланган қисми газ жиҳозлари жойлашган орқа қисми бўлган.

Ҳодисадан сўнг воқеа жойига тезкор хизматлар етиб келган. Улар ҳодиса оқибатларини бартараф этиш учун зарур чораларни кўрган.

Портлашдан сўнг газ тўлдириш станцияси ҳудудида ёнғин содир бўлмаган. Мавжуд маълумотларга кўра, ҳодиса оқибатида фуқаролардан ҳеч ким жабрланмаган.