Тошкент, Ўзбекистон (UzDaily.uz) — Ўзбекистон ва Туркиянинг Cengiz Holding компанияси геологик ўрганиш ва конларни ўзлаштириш истиқболларини, жумладан, Сурхондарё ва Тошкент вилоятларидаги кўмир участкаларини қидириш масалаларини муҳокама қилди.
Учрашув 2026 йил 23 октябрь куни бўлиб ўтди. Тоғ-кон саноати ва геология вазирининг биринчи ўринбосари Феруза Ҳамидова Ўзбекистондаги Cengiz Holding минтақавий раҳбари, CENERGO МЧЖ бош директори Жанер Карабай билан музокаралар ўтказди.
Томонлар мамлакатда истиқболли участкаларни геологик ўрганиш, шунингдек, икки вилоятда кўмир конларини қидириш ва қазиб олиш имкониятларини кўриб чиқди.
Туркия компанияси вакилларига «Ер ости бойликлари тўғрисида»ги қонуннинг янги таҳрири қоидалари, жумладан, тадбиркорлар ва инвесторларга қўйиладиган талаблар ҳамда қонунчиликда лойиҳаларни амалга ошириш учун назарда тутилган имкониятлар тушунтирилди.
Ер қаъридан фойдаланиш ҳуқуқини E-auksion электрон платформаси орқали олиш тартибига ҳам алоҳида эътибор қаратилди.
Вазирлик маълумотига кўра, мазкур механизм ер қаъридан фойдаланиш ҳуқуқини шаффоф электрон аукционлар орқали тақдим этишни назарда тутади.
Учрашув Ўзбекистоннинг геология соҳасидаги ҳамкорликни ривожлантириш ва минерал-хомашё ресурсларини ўзлаштириш истиқболларига бағишланди.
