Япония компаниялари Тошкент вилояти учун лойиҳалар таклиф қилди

Тошкент, Ўзбекистон (UzDaily.uz) — Тошкент вилояти ҳокими Зоир Мирзаев Япониянинг етакчи компаниялари вакиллари билан учрашув ўтказди. Унда томонлар ҳудудда инвестициявий ва технологик ҳамкорликни кенгайтириш масалаларини муҳокама қилди.

Таклиф этилган лойиҳалар қаторида IT-аутсорсинг марказини ташкил этиш, Нурафшонда «ақлли шаҳар» пилот лойиҳасини ишга тушириш ҳамда япон мебели ва дизайни кластерини ташкил этиш бор. Бу ҳақда Тошкент вилояти ҳокимлиги хабар берди.

Учрашув давомида иштирокчилар Япониянинг рақамли трансформация, яшил технологиялар ва саноатни модернизация қилиш соҳаларидаги илғор тажрибаси юзасидан фикр алмашди, шунингдек, Тошкент вилоятининг инвестициявий имкониятларини кўриб чиқди.

Зоир Мирзаев вилоятда хорижий инвесторлар, жумладан, ахборот технологиялари соҳасида фаолият юритувчи компаниялар учун қулай шароитлар яратилганини таъкидлади.

Япония компанияларига IT-аутсорсинг марказини ташкил этиш ва Нурафшонда «ақлли шаҳар» пилот лойиҳасини амалга ошириш таклиф қилинди.

Шунингдек, давлат бошқаруви, коммунал хўжалик, тиббиёт ва транспорт соҳаларида рақамли ечимларни жорий этиш имконияти муҳокама қилинди.

Мебель саноатини ривожлантириш алоҳида йўналиш сифатида кўриб чиқилди. Томонлар «Сайдовул» саноат зонасида япон мебели ва дизайни кластерини ташкил этиш таклифини муҳокама қилди. Лойиҳа япон мебели ишлаб чиқаришини маҳаллийлаштириш ва кейинчалик тайёр маҳсулотларни ташқи бозорларга экспорт қилишни назарда тутади.

Кадрлар тайёрлаш масаласи ҳам учрашув кун тартибидан ўрин олди. Япония компаниялари билан ҳамкорликда касбий таълим ва япон тилини ўрганиш марказларини ташкил этиш таклиф қилинди. У ерда ёшлар замонавий стандартларга мувофиқ IT, тиббий парвариш ва мебель ишлаб чиқариш йўналишларида тайёргарликдан ўтиши кўзда тутилмоқда.

Музокаралар якунида томонлар муҳокама қилинган йўналишлар бўйича амалий ҳамкорликни давом эттириш ва истиқболли лойиҳаларни биргаликда амалга оширишга келишиб олди.