UzAuto Motors Chevrolet Suburban High Country сотувини бошлади

Тошкент, Ўзбекистон (UzDaily.uz) — «UzAuto Motors» АЖ Ўзбекистон бозорида янги Chevrolet Suburban High Country йўлтанламас автомобили сотуви бошланганини эълон қилди.

Автомобиль 6,2 литр ҳажмли, 420 от кучига эга атмосферали бензинли V8 двигатели билан жиҳозланган. Куч агрегати 10 поғонали автоматик узатмалар қутиси ва тўлиқ юритма тизими билан уйғунликда ишлаб, турли йўл қопламаларида ишончли тезланиш ва барқарор ҳаракатни таъминлайди.

Модельнинг стандарт жиҳозлар тўпламига адаптив пневматик осма тизими, шунингдек, замонавий хавфсизлик тизимлари мажмуаси киради. Улар орасида курс барқарорлиги тизими (ESC), сирпанишга қарши тизим (TCS), тормоз кучини электрон тақсимлаш тизими (EBD), пиёдаларни аниқлаш тизими, автоматик фавқулодда тормозлаш тизими, ҳаракатланиш йўлагида ушлаб туриш тизими ҳамда кўринмайдиган ҳудудларни кузатиш тизими мавжуд.

Автомобилнинг мультимедиа тизими 17,7 дюймли рангли дисплей билан жиҳозланган. Ҳайдовчи учун проекцион дисплей ва диагонали 11 дюймли рақамли асбоблар панели ҳам назарда тутилган.

Chevrolet Suburban High Country узунлиги 5748 мм, кенглиги 2058 мм, баландлиги 1934 ммни ташкил этади. Ғилдирак базаси 3407 мм. Йўлтанламас етти нафар йўловчига мўлжалланган бўлиб, кенг юкхонага эга. Компания таъкидлашича, салоннинг кенглиги ушбу моделни катта оилалар, корпоратив сафарлар, узоқ масофали саёҳатлар ва фаол турмуш тарзи учун муносиб танловга айлантиради.

Chevrolet Suburban High Country учун тавсия этилган чакана нарх 1 485 100 000 сўмни ташкил этади.

Модель ҳақида қўшимча маълумотни UzAuto Motors call-маркази, Chevrolet Uzbekistan расмий сайти ҳамда компаниянинг расмий дилерлари орқали олиш мумкин.