Наманганда ноқонуний диний таълим ҳолати аниқланди

Тошкент, Ўзбекистон (UzDaily.uz) — Наманган вилояти Янги Наманган туманида ҳуқуқни муҳофаза қилувчи органлар ходимлари томонидан вояга етмаганларга ноқонуний диний таълим берилгани ҳолати аниқланди. Бу ҳақда Ички ишлар вазирлиги матбуот хизмати хабар қилди.

Идора маълумотларига кўра, «Янги Замин» маҳалласида яшовчи фуқаро болалар учун диний машғулотлар ташкил қилган. Аниқланишича, у 27 нафар вояга етмаган болага таълим бериб, уларнинг ота-оналаридан ҳар бири учун 100 АҚШ долларидан ҳақ олган.

Мазкур ҳолат юзасидан Ўзбекистон Республикаси Жиноят кодексининг диний таълимотларни ўқитиш тартибини бузганлик учун жавобгарликни назарда тутувчи 229-2-моддаси иккинчи қисми билан жиноят иши қўзғатилди. Ҳозирги вақтда тергов ҳаракатлари олиб борилмоқда.

Шунингдек, вояга етмаганларнинг ота-оналарига нисбатан Ўзбекистон Республикасининг Маъмурий жавобгарлик тўғрисидаги кодексининг болаларни тарбиялаш ва ўқитиш бўйича мажбуриятларни бажармаслик учун жавобгарликни назарда тутувчи 47-моддасига мувофиқ чоралар кўрилди.

Уларга беш баравар базавий ҳисоблаш миқдори (БҲМ) миқдорида жарима тайинланди.