Тўрабек Хабибуллаев бокс бўйича жаҳон чемпионатида Ўзбекистонга тўртинчи олтин медални олиб келди

Тошкент, Ўзбекистон (UzDaily.uz) — 90 кг вазн тоифасида иштирок этган Тўрабек Хабибуллаев Ливерпулда ўтаётган бокс бўйича жаҳон чемпионатида Ўзбекистон терма жамоаси учун тўртинчи олтин медални қўлга киритди.

Финал жангда 21 ёшли ўзбек спортчиси Исаиас Рибеирога қарши рингга кўтарилди. Биринчи раунд 3:2 ҳисобида унинг фойдасига якунланди, иккинчи раундда эса Хабибуллаев устунлигини мустаҳкамлаб, 4:1 ҳисобини қайд этди. Сўнгги раундда ҳам у жангни ишончли назорат қилиб, муносиб ғалабага эришди.

Шу тариқа, Ўзбекистон терма жамоаси ҳисобида жаҳон чемпионатида тўртта олтин ва учта бронза медали мавжуд.