АҚШ ЖЧ-2026да Парагвайни йирик ҳисобда мағлуб этди

Тошкент, Ўзбекистон (UzDaily.uz) — Шимолий Америкада ўтаётган 2026 йилги футбол бўйича жаҳон чемпионати доирасида D гуруҳининг биринчи тур учрашуви бўлиб ўтди. АҚШ терма жамоаси Калифорния штатидаги Лос-Анжелес шаҳри стадионида Парагвай миллий жамоаси устидан 4:1 ҳисобида ишончли ғалабага эришди. Ушбу баҳс бошланган жаҳон чемпионатининг бир қатор статистик рекордлари билан ҳам ёдда қолди.

Учрашувда ҳисоб 7-дақиқадаёқ кутилмаган ҳолат орқали очилди: Парагвай ярим ҳимоячиси Дамьян Бобадилья тўпни ўз дарвозасига йўллаб қўйди ва жорий мундиалдаги илк автогол муаллифига айланди. Шундан кейин ташаббус мезбонлар томонига ўтди. АҚШ ҳужумчиси Фоларин Балоган 31-дақиқада ва биринчи бўлимга қўшиб берилган вақтда (45+5) аниқ зарба билан гол урди ҳамда турнирдаги илк дублни расмийлаштирди.

Ўйиннинг иккинчи бўлимида, 73-дақиқада Маурисио Лотин Америкаси жамоаси сафида битта гол уриб ҳисобни қисқартирди. Бироқ учрашувнинг сўнгги қисмида (90+8) Джованни Рейна якуний йирик ҳисобни ўрнатди.

Эслатиб ўтамиз, D гуруҳида АҚШ ва Парагвайдан ташқари Туркия ҳамда Австралия терма жамоалари ҳам иштирок этмоқда. Уларнинг ўзаро баҳси 14 июнь кунига режалаштирилган.

Гуруҳ босқичининг иккинчи турида АҚШ жамоаси 19 июнь куни Австралияга қарши майдонга тушади. Парагвай эса кейинги куни Туркия терма жамоаси билан баҳс олиб боради.