Тошкентда Сергели автомобиль бозори ва яна 34 та объект хусусийлаштирилади
Тошкент, Ўзбекистон (UzDaily.uz) — Ўзбекистон Президенти Шавкат Мирзиёев Тошкент шаҳрини ижтимоий-иқтисодий ривожлантириш чора-тадбирларини тасдиқлади. Улар пойтахтдаги 35 та бозор ва савдо объектини хусусийлаштиришни назарда тутади. Тегишли қарор 27 июль куни имзоланди.
Ҳужжат иқтисодиётда давлат иштирокини қисқартириш ҳамда савдо ва хизмат кўрсатиш соҳаларини ривожлантириш учун қўшимча имкониятлар яратишга қаратилган.
Барча объектларни Tashkent Invest муниципал компанияси томонидан ишлаб чиқилган лойиҳалар асосида тайёр бизнес шаклида очиқ савдолар орқали реализация қилиш режалаштирилган. Мастер-режаларни тайёрлашни молиялаштириш Тошкент шаҳрини ривожлантириш жамғармаси маблағлари ҳисобидан амалга оширилади.
Хусусийлаштириш шартларига кўра, янги мулкдорлар бозорлар ва савдо мажмуалари ҳудудида замонавий экобозорлар, савдо, сервис ва кўнгилочар объектларни ташкил этиши, шунингдек, кўп қаватли автомобиль тураргоҳларини барпо этиши керак бўлади.
Бозорларга тегишли ер участкалари ва кўчмас мулк объектлари давлат улушини ошириш ҳисобига Tashkent Invest компанияси мулкига ўтказилади. Бунда кўчмас мулк утилизация қиймати бўйича баҳоланади, ер участкалари эса ер солиғи ставкасининг максимал пасайтирувчи коэффициенти қўлланган ҳолда ҳисобланади.
Tashkent Invest компаниясига ўтказилган ҳудудларда қурилиш ва реконструкция ишларини амалга ошириш ҳуқуқи берилади.
Объектлар сотилганидан кейин компанияга битим суммасининг 1 фоизи ўтказилади, шунингдек, савдоларни тайёрлаш ва ўтказиш билан боғлиқ харажатлар қоплаб берилади.
Хусусийлаштирилиши режалаштирилган объектлар рўйхатига «Авиастроителей», «Қорақамиш», «Қўйлиқ», «Наврўз», «Сергели» ва «Фарҳод» деҳқон бозорлари, «Наврўз» бозорининг еттита филиали, «Сергели» бозорининг олтита филиали, «Қорақамиш» бозорининг бешта филиали ва «Юнусобод» бозорининг иккита филиали киритилган.
Шунингдек, «Чилонзор», «Бектўпи», «Бешқўрғон», «Паркент универсал» ва «Ўрикзор» савдо мажмуалари, «Бектўпи» ва «Чилонзор» савдо мажмуаларининг автомобиль тураргоҳлари, «Янгиобод» ихтисослаштирилган бозори филиали билан бирга, шунингдек, Сергели автомобиль бозори ҳам савдога чиқарилади.
