Тошкент, Ўзбекистон (UzDaily.uz) — Тошкент шаҳрида иссиқлик энергиясини ишлаб чиқариш ва уни истеъмолчиларга етказиб бериш тасдиқланган режаларга мувофиқ амалга оширилмоқда. Бу ҳақда Ўзбекистон Энергетика вазирлиги хабар берди.
Иссиқлик энергияси «Иссиқлик электр станциялари» АЖ таркибига кирувчи Тошкент иссиқлик маркази ва Тошкент иссиқлик электр маркази, шунингдек, пойтахтнинг тўртта туманида жойлашган йирик ва кичик когенерация марказлари томонидан ишлаб чиқарилмоқда.
Вазирлик маълумотларига кўра, Тошкент иссиқлик маркази шаҳарнинг марказлашган иссиқлик таъминоти тизимига уланган истеъмолчилар эҳтиёжининг 70 фоиздан ортиғини таъминлайди. Тошкент иссиқлик электр марказининг улуши эса 16 фоизни ташкил этади.
Куз-қиш мавсумига тайёргарлик доирасида жорий йилда Тошкент иссиқлик марказининг тўққизта иссиқлик марказида олтита қозон агрегати капитал таъмирдан чиқарилди, яна 54 тасида жорий таъмирлаш ишлари бажарилди.
Тошкент иссиқлик электр марказида эса тўртта қозон агрегати, учта газ-поршенли агрегат ва битта турбоагрегат таъмирланди. Қайд этилган барча объектлар куз-қиш мавсумига тайёр ҳолатга келтирилган.
