Тошкент, Ўзбекистон (UzDaily.uz) — «Ўзтўқимачиликсаноат» уюшмаси раиси Муҳаммаджон Жуманиязов Ўзбекистондаги Бангладеш элчиси Муҳаммад Монирул Ислом билан учрашди.
Томонлар тўқимачилик соҳасидаги савдо-иқтисодий ҳамкорликни кенгайтириш масалаларини муҳокама қилди. Бу ҳақда «Ўзтўқимачиликсаноат» уюшмаси хабар берди.
Музокаралар давомида ўзбек тўқимачилик маҳсулотлари экспортини Бангладешга ошириш, Читтагонг шаҳридаги омбор инфратузилмасидан фойдаланиш ҳамда гилам маҳсулотлари ишлаб чиқарувчилар учун жут хомашёсини марказлашган тартибда импорт қилиш имкониятлари кўриб чиқилди.
Шунингдек, Ўзбекистонда янги инвестиция лойиҳаларини амалга ошириш, Бангладешдан малакали мутахассислар ва ишчиларни жалб қилиш масалалари ҳам муҳокама қилинди.
Бундан ташқари, томонлар 2027 йил январь ойида ўтказилиши режалаштирилган BATEXPO халқаро кўргазмаси доирасида ўзбек тўқимачилик корхоналарининг Бангладешга бизнес-миссиясини ташкил этиш масаласини ишлаб чиқишга келишиб олди.
Ташриф дастури доирасида B2B учрашувлар, Бангладешнинг саноат ва савдо вазирликлари, шунингдек, тўқимачилик саноати ва жут масалалари билан шуғулланувчи идоралари билан музокаралар ўтказиш назарда тутилган.
Шунингдек, BGMEA ва BKMEA тармоқ бирлашмалари билан учрашувлар ташкил этиш ҳамда мамлакатдаги йирик тўқимачилик корхоналари фаолияти билан танишиш режалаштирилган.
