Тошкент, Ўзбекистон (UzDaily.uz) — Тошкент шаҳрида жами 17,9 км узунликдаги тўртта кўчада жамоат транспорти учун алоҳида йўлаклар ташкил этиш режалаштирилмоқда. Лойиҳа йўл қопламасини таъмирлаш ишларини ҳам ўз ичига олади. Бу ҳақда пойтахт ҳокимлиги матбуот хизмати хабар берди.
Ишларнинг бир қисми Яшнобод ва Чилонзор туманлари ҳудудидан ўтувчи, узунлиги 4,6 км бўлган Муқимий кўчасида, шунингдек, Шайхонтоҳур туманидаги Қоратўш ва Кўкча Дарвоза кўчаларида амалга оширилиши режалаштирилган.
Мирзо Улуғбек туманидаги Паркент кўчасининг 2,8 км узунликдаги қисмида ва Мирзо Улуғбек шоҳкўчасининг 6,3 км қисмида ҳам алоҳида автобус йўлаклари ташкил этилади.
Лойиҳани амалга ошириш тўғрисидаги қарор пойтахт ҳокими томонидан имзоланган. Аввалроқ мутахассислар жамоат транспорти йўналишлари бўйича ҳаракатланадиган 150 кмдан ортиқ йўлни ўрганиб чиққан. Текширув натижаларига кўра, биринчи навбатда қарийб 18 км йўлда ишларни амалга ошириш тавсия этилган.
Ҳозирда лойиҳа ҳужжатларини тайёрлаш учун бюджет шакллантирилмоқда. Ушбу ишларнинг дастлабки қиймати тахминан 6,5 млрд сўмга баҳоланмоқда. Молиялаштириш Тошкент шаҳрини ривожлантириш жамғармаси маблағлари ҳисобидан амалга оширилиши режалаштирилган.
Буюртмачи сифатида «Тошкент инвест компанияси» кўриб чиқилмоқда. Лойиҳалаш ташкилотлари ва пудратчилар танловлар натижаларига кўра белгиланиши кўзда тутилган.
Қурилиш ишлари бошланишидан олдин мутахассислар муҳандислик коммуникациялари ва коммунал тармоқларни текширади. Лойиҳа ҳужжатларида пиёдалар учун хавфсиз йўналишлар, бекат мажмуалари, йўл кўрсаткичлари ва ёритиш тизимлари ҳам назарда тутилиши керак.
Йўл қопламасини ётқизишда полимер модификацияланган битум ва тоғ жинсларидан олинган мустаҳкам чақиқтошдан тайёрланадиган чақиқтош-мастик асфальтобетондан (ЧМА) фойдаланиш режалаштирилган.
Ҳокимликда тушунтирилишича, алоҳида автобус йўлакларини ташкил этиш автобусларнинг ҳаракат тезлигини ошириш ва йўловчилар учун сафарларни янада қулай қилишга хизмат қилади.
Жамоат транспортини ривожлантириш зарурати, жумладан, пойтахтда автомобиллар сони ортиб бораётгани билан боғлиқ. Тошкент шаҳридаги автомобиллар парки ҳар йили тахминан 30 мингта машинага кўпаймоқда.
