Тошкент, Ўзбекистон (UzDaily.uz) — Ўзбекистонда яйловлардан фойдаланиш самарадорлигини ошириш, табиий ландшафтларни сақлаш ва чорвачиликни ривожлантириш чора-тадбирлари муҳокама қилинди. Учрашувда қишлоқ хўжалиги вазирининг маслаҳатчиси Нуриддин Қўшназаров, «Ўзбекистонда юқори экологик қийматга эга ландшафтларни сақлаш ва тиклаш учун интеграциялашган бошқарув» лойиҳаси раҳбари Улуғбек Исломов ҳамда хорижий эксперт Сара Робинсон иштирок этди. Бу ҳақда Ўзбекистон Қишлоқ хўжалиги вазирлиги хабар берди.
Учрашув иштирокчилари яйлов ерларидан оқилона фойдаланиш, табиий ҳудудларни сақлаш ва тиклаш, шунингдек, чорвачилик хўжаликлари фаолиятини қўллаб-қувватлашга қаратилган ташаббусларни кўриб чиқди. Соҳага масъул ташкилотлар ўртасидаги ҳамкорликни мустаҳкамлаш ва белгиланган чора-тадбирларни изчил амалга ошириш масалаларига алоҳида эътибор қаратилди.
Музокаралар давомида Ўзбекистон Президентининг жорий йил 14 октябрдаги ПҚ-374-сонли «Яйлов ерларидан самарали фойдаланиш ва чорвачилик хўжаликларини давлат томонидан қўллаб-қувватлаш бўйича қўшимча чора-тадбирлар тўғрисида»ги қарорида белгиланган вазифаларнинг бажарилиши ҳам муҳокама қилинди.
Томонлар лойиҳанинг жорий ҳолати, амалга оширилган ишлар ва эришилган натижаларни кўриб чиқди. Устувор йўналишлар қаторида юқори экологик ва иқтисодий қийматга эга ландшафтларни сақлаш, табиий ресурслардан барқарор фойдаланиш ва қишлоқ ҳудудларида экологик мувозанатни мустаҳкамлаш белгиланди.
Учрашув якунида иштирокчилар белгиланган вазифаларни келгусида бажариш ва лойиҳа доирасидаги ишларни давом эттириш юзасидан фикр алмашди.
