Тошкент, Ўзбекистон (UzDaily.uz) — Тошкент вилоятида фирибгарликни ўта йирик миқдорда содир этганликда гумонланаётган, Олмалиқ шаҳрида туғилган 48 ёшли Павел Ким қўлга олинди.
Тергов маълумотларига кўра, у фуқароларга қарз бериб, амалда топширилган пул миқдоридан анча юқори суммалар кўрсатилган тилхатларни расмийлаштиришни талаб қилган. Вилоят Ички ишлар бош бошқармасига эҳтимолий жабрланувчилардан 65 та ариза келиб тушган. Бу ҳақда Тошкент вилояти ИИББ матбуот хизмати хабар берди.
Ҳуқуқни муҳофаза қилувчи органлар маълумотига кўра, Ким фуқаролардан бирига 1 минг доллар қарз берган, бироқ тилхатда 10 минг доллар миқдорини кўрсатган. Кейинчалик у ушбу ҳужжатларга асосланиб, пулни ундириш учун судларга мурожаат қилган.
Гумонланувчининг хонадони ва идорасида ўтказилган тинтувлар давомида қарийб 100 та қарз тилхати, 55 та кўчмас мулк объектига оид кадастр ҳужжатлари ҳамда пневматик қурол аниқланган. Шунингдек, тахминан 50 нафар фуқародан пул маблағларини ундириш бўйича Мажбурий ижро бюроси ҳужжатлари топилган. Улар орасида 14 нафар хорижий фуқаронинг исмлари ҳам бор.
Кимга нисбатан Ўзбекистон Республикаси Жиноят кодексининг 168-моддаси 4-қисми «а» банди (ўта йирик миқдорда фирибгарлик), 188-моддаси 1-қисми (ноқонуний тадбиркорлик фаолияти) ва 205-моддаси 2-қисми «а» банди (ҳокимият ёки мансаб ваколатини суиистеъмол қилиш, ўта кўп миқдорда зарар етказиш) билан жиноят иши қўзғатилган.
Гумонланувчи қўлга олиниб, қамоққа олинган. Тергов ҳаракатлари давом этмоқда.
Ҳуқуқни муҳофаза қилувчи органлар Кимнинг хатти-ҳаракатларидан жабр кўрган бўлиши мумкин бўлган ёки унинг фаолияти ҳақида маълумотга эга фуқароларни Тошкент вилояти ИИББга 71-762-20-82 ёки 102 телефон рақамлари орқали мурожаат қилишга чақирмоқда. Мурожаат қилувчиларнинг шахси сир сақланиши кафолатланади.
