Тошкент, Ўзбекистон (UzDaily.uz) — 2027 йилда Ўзбекистонда Россия–Ўзбекистон кинофорумини ўтказиш режалаштирилмоқда.
Бу ҳақда Россия маданият вазири ўринбосари Андрей Малышев Туркманистон пойтахтида бўлиб ўтган МДҲ мамлакатлари маданий ҳамкорлик кенгаши йиғилиши доирасида ТАСС агентлигига маълум қилди.
Малышевнинг сўзларига кўра, форумни ўтказиш Россия маданият вазири Ольга Любимованинг топшириғига мувофиқ режалаштирилган. Аввалроқ вазир ушбу ташаббус билан чиққан эди.
Вазир ўринбосарининг тушунтиришича, тадбир россиялик кинематографчиларга Ўзбекистондаги истиқболли суратга олиш майдончалари билан танишиш, кастинглар ўтказиш ҳамда маҳаллий продюсерлар билан алоқалар ўрнатиш имконини беради.
Шунингдек, форум иштирокчилари кино лойиҳаларини биргаликда молиялаштириш имкониятларини ҳам муҳокама қилишлари мумкин.
5 октябрь куни Ольга Любимова Ўзбекистон маданият вазири Озодбек Назарбеков билан учрашган эди.
Музокаралар давомида Россия томони Россия–Ўзбекистон кинофорумини ташкил этиш таклифини илгари сурган.
