Тошкент, Ўзбекистон (UzDaily.uz) — Ўзбекистонда 9 ноябрдан бошлаб совуқ ва нам ҳаво массаларининг кириб келиши сабабли об-ҳаво кескин ўзгариши кутилмоқда.
Совуқ ҳаво 9 ноябрь куни республиканинг шимолий ҳудудларига кириб келади. 10–12 ноябрь кунлари эса мамлакатнинг бошқа ҳудудларига ҳам тарқалади. Бу ҳақда Ўзгидромет хабар берди.
9–11 ноябрь кунлари Ўзбекистоннинг катта қисмида ёмғир ёғади, айрим жойларда ёғингарчилик кучли бўлиши мумкин. Шимолий ва тоғли ҳудудларда 10–11 ноябрь кунлари ёғингарчилик қорга айланиши эҳтимоли бор.
Айрим ҳудудларда шамол тезлиги секундига 13–18 метргача кучаяди.
Ҳаво ҳарорати аста-секин пасаяди. Мамлакатнинг шимолий ҳудудлари ва чўл зонасида кечаси 2–7 даража совуқ, кундузи эса 3–8 даража илиқ бўлиши кутилмоқда.
Бошқа ҳудудларда кечаси ҳаво ҳарорати 0–5 даража илиқни ташкил этади, айрим жойларда эса 1–2 даража совуққача пасайиши мумкин.
Кундузи ҳаво ҳарорати 7–12 даража илиқ бўлади.
