Тошкент вилоятида давлат ерини ноқонуний сотишга уринишга чек қўйилди

Тошкент, Ўзбекистон (UzDaily.uz) — Тошкент вилоятининг Оҳангарон туманида ҳуқуқни муҳофаза қилувчи органлар давлат мулки ҳисобланган ер участкасини ноқонуний сотишга уринишга чек қўйди.

Тергов маълумотларига кўра, 1992 йилда туғилган фуқаро харидорга Бўка туманида жойлашган, майдони 50 сотих бўлган бўш ер участкасини сотиб олишни таклиф қилган. Мазкур ер участкасига кадастр ҳужжатлари расмийлаштирилмаган бўлиб, у давлат мулки ҳисобланган.

Гумонланувчи ернинг ҳар бир сотихини 340 АҚШ долларига баҳолаб, бутун ер участкасини 17 минг АҚШ долларига сотишга келишган. Шу билан бирга, у ўз танишлари орқали зарур кадастр ҳужжатларини расмийлаштириб беришни ваъда қилган.

Тезкор тадбир давомида эркак келишилган маблағнинг 1,5 минг АҚШ доллари миқдоридаги қисмини олаётган вақтда қўлга олинди.

Мазкур ҳолат юзасидан Ўзбекистон Республикаси Жиноят кодексининг 168-моддаси учинчи қисми «а» банди (фирибгарлик), шунингдек, Жиноят кодексининг 28-моддаси орқали 211-моддаси иккинчи қисми «б» банди билан жиноят иши қўзғатилди. Ҳозирги вақтда тергов ҳаракатлари олиб борилмоқда.

Ҳуқуқни муҳофаза қилувчи органларда эслатилишича, давлат мулкини ноқонуний тасарруф этиш ҳамда ер участкаларини сотиш билан боғлиқ фирибгарлик схемалари жиноий жавобгарликка сабаб бўлади.