Самарқандда банкни талашга уринишнинг олди олинди

Тошкент, Ўзбекистон (UzDaily.uz) — Самарқанд шаҳрида Ички ишлар вазирлиги Қўриқлаш департаменти ходимлари банкни талашга уринишнинг олдини олди. Банк бўлимига бостириб кириб, портловчи қурилма қўллаш билан таҳдид қилган эркак музокаралардан сўнг ихтиёрий равишда ҳуқуқни муҳофаза қилувчи органларга таслим бўлди.

Идора матбуот хизмати маълум қилишича, ҳодиса 13 июль куни соат тахминан 17:00 да Мирзо Улуғбек кўчасида жойлашган банклардан бирида содир бўлган. Хавф сигнали келиб тушгач, тезкор ҳаракатланиш гуруҳи уч дақиқа ичида воқеа жойига етиб келган.

Қўриқлаш департаменти маълумотларига кўра, бинода қишки кийим ва ниқоб кийган, қора сумка кўтариб юрган эркак бўлган. У ойналарни синдирган, унга пул беришни талаб қилган ҳамда сумкасида портловчи қурилма борлигини айтган.

Ҳодиса жойига ички ишлар органларининг қўшимча кучлари ва тез тиббий ёрдам бригадаси юборилди. Қўриқлаш хизмати ходимлари эркакни ўз ниятидан қайтаришга муваффақ бўлди ва шундан сўнг у ихтиёрий равишда таслим бўлди.

Қўлга олинган шахснинг айтишича, у пулни тезда қўлга киритишни режалаштирган ва буни осон даромад топиш усули деб ҳисоблаган.

Ҳодиса оқибатида ҳеч ким жабрланмади.

Мазкур ҳолат юзасидан Ўзбекистон Республикаси Жиноят кодексининг 164-моддаси 4-қисми («Босқинчилик») билан жиноят иши қўзғатилди. Ҳуқуқни муҳофаза қилувчи органлар тергов ҳаракатларини олиб бормоқда ва воқеанинг барча ҳолатларини аниқламоқда.