Ўзбекистонда электр энергияси истеъмоли бўйича янги рекорд ўрнатилди: ёзги максимум қишки кўрсаткичдан ошди

Тошкент, Ўзбекистон (UzDaily.uz) — Ўзбекистон Ягона энергетика тизимида электр энергиясининг бир суткалик истеъмоли бўйича янги тарихий рекорд қайд этилди. Энергетика вазирлиги маълум қилишича, 14 июль куни электр энергияси истеъмоли 284 миллион кВт·соатга етди ва аввалги ёзги рекорд ҳамда қиш мавсумида қайд этилган энг юқори кўрсаткичдан ошиб кетди.

Вазирлик маълумотларига кўра, янги рекорд 2026 йил 13 июль куни қайд этилган аввалги ёзги рекорд — 278,6 миллион кВт·соатдан 5,4 миллион кВт·соатга ёки 1,94 фоизга юқори бўлди. Шунингдек, у 2026 йил 24 январда ўрнатилган қишки максимумдан ҳам ошди. Ўша куни бир суткалик электр энергияси истеъмоли 283 миллион кВт·соатни ташкил этган эди.

Шу куни электр энергияси ишлаб чиқариш ҳажми ҳам 287,3 миллион кВт·соатга етди. Бу кўрсаткич аввалги қишки ишлаб чиқариш рекорди — 277,6 миллион кВт·соатдан 9,7 миллион кВт·соатга ёки 3,49 фоизга юқори бўлди.

Вазирликда таъкидланишича, талаб кескин ошган шароитда ишончли электр таъминотини таъминлаш мақсадида энергетика корхоналарининг авария-таъмирлаш бригадалари кучайтирилган иш режимига ўтказилган ва юзага келаётган носозликларни тезкор бартараф этмоқда.

Хусусан, бир кун аввал мутахассислар Тошкент шаҳрининг Чилонзор, Шайхонтоҳур, Яккасарой, Сергели ва Олмазор туманларида электр тармоқларининг айрим участкаларида юзага келган узилишларни бартараф этди. Шунингдек, кучли шамолдан сўнг Қашқадарё вилоятининг Қарши, Косон, Кўкдала, Қамаши, Ғузор, Китоб ва Чироқчи туманларида электр узатиш линиялари қайта тикланди.

Айни пайтда ҳудудларда энергетика инфратузилмасини модернизация қилиш бўйича режали ишлар давом этмоқда. Улар электр станциялари, подстанциялар, трансформатор пунктлари, электр узатиш линиялари ва бошқа ускуналарни янгилаш, шунингдек, юқори юклама даврларида электр таъминоти ишончлилигини ошириш мақсадида уларнинг қувватини кенгайтиришни ўз ичига олади.

Вазирлик огоҳлантиришича, электр энергияси энг кўп истеъмол қилинадиган соатларда тармоқлардаги техник носозликлар сабабли айрим ҳудудларда электр таъминотида қисқа муддатли узилишлар кузатилиши мумкин.

Идора аҳолини электр энергиясидан оқилона фойдаланишга чақирди. Хусусан, кондиционерлар ҳароратини 24–26°C даражада ўрнатиш ва уларнинг фильтрларини мунтазам тозалаб туриш тавсия этилди. Бу электр энергияси истеъмолини камайтириш, электр тармоқларига тушадиган юкламани пасайтириш ҳамда соғлиқ учун янада қулай шароит яратиш имконини беради.