Шавкат Мирзиёев Беларусь билан лойиҳаларни жадаллаштиришни буюрди

Тошкент, Ўзбекистон (UzDaily.uz) — Президент Шавкат Мирзиёев Беларусга ташриф давомида ҳудудлараро ҳамкорликни кенгайтириш бўйича эришилган келишувлар ижросига доир тақдимот билан танишди.

Қайд этилганидек, давлатимиз раҳбаринг 8-9 июль кунлари ушбу мамлакатга амалга оширилган расмий ташрифи чоғида ўзаро савдо ҳажмини 2 миллиард долларга етказиш, машинасозлик, қишлоқ хўжалиги, фармацевтика, тўқимачилик, ёғочни қайта ишлаш ва тиббиёт соҳаларида умумий қиймати 2 миллиард долларлик 310 та лойиҳа ва чора-тадбирни рўёбга чиқариш бўйича муҳим келишувларга эришилди.

Давлатимиз раҳбари уларни қисқа муддатда амалий натижага айлантириш, янги корхоналар ва иш ўринларини ташкил этиш, тадбиркорлар учун зарур шарт-шароитларни яратиш муҳимлигини таъкидлади.

Беларусда инвестиция лойиҳаларини жойлаштириш учун таклиф этилаётган саноат объектлари, давлат мулки ва кенг қишлоқ хўжалиги ерлари мавжуд. Мамлакат ҳудудининг 40 фоизини ёки 8 миллион гектарини қишлоқ хўжалиги майдонлари ташкил этади.

Бу имкониятлар қўшма ишлаб чиқаришларни йўлга қўйиш, аграр кооперацияни ривожлантириш, тадбиркорлик алоқаларини кенгайтириш ҳамда фуқароларни ташкилий асосда иш билан таъминлаш учун мустаҳкам замин яратади.

Бунда Беларусда ишлаш ёки бизнес юритиш истагидаги фуқаролар ва тадбиркорлар рўйхатини шакллантириб, Беларусь томони билан олдиндан келишиб, иш жойи, яшаш шароити, лойиҳа учун зарур бино ва ер масалаларини ҳал этган ҳолда уларнинг боришини ташкил қилиш зарурлиги кўрсатиб ўтилди.

Тақдимотда Андижон ва Витебск вилоятлари ўртасидаги ҳамкорлик доирасида бажарилган ишлар ҳақида ахборот берилди.

Икки ҳудуд ўртасида “йўл харитаси” тасдиқланиб, аниқ ташаббусларни рўёбга чиқариш бошланган. Жумладан, 255 нафар Андижон вилояти фуқаросининг ташкилий асосда Витебскка бориши ва бандлиги таъминланди.

Шунингдек, 11 та чорвачилик мажмуаси негизида янги лойиҳаларни йўлга қўйиш бўйича келишувга эришилди. Уларнинг ҳар бири 200 бошдан 3 минг бошгача қорамол парваришлаш имкониятига ҳамда етарли озуқа майдонларига эга.

“Андижон инвест” компанияси иштирокида йирик чорвачилик комплекси ва санаторий мажмуаси негизида инвестиция ҳамда ижтимоий ташаббусларни бошлаш чоралари кўрилмоқда.

Умуман, Витебск ва Беларуснинг бошқа вилоятларида чорвачилик, ёғочни қайта ишлаш, логистика, савдо ва хизмат кўрсатиш йўналишларида умумий қиймати 100 миллион доллардан зиёд бўлган 30 та янги лойиҳа пакети шакллантирилди.

Хусусан, Витебск вилоятида 3 минг бош қорамолга мўлжалланган йирик сутчилик мажмуаси, бир қатор ўрта ҳажмдаги чорвачилик хўжаликлари, ёғочни чуқур қайта ишлаш ва унинг чиқиндиларидан пеллет ишлаб чиқариш корхонасини ташкил этиш режалаштирилган.

Президентимиз Андижон ва Витебск вилоятлари ўртасида шаклланган ҳамкорлик моделини бошқа ҳудудлар кесимида ҳам ривожлантириш бўйича кўрсатмалар берди.

Бухоро, Қашқадарё, Навоий, Наманган, Тошкент, Фарғона ва Самарқанд вилоятлари Беларуснинг Витебск, Могилёв, Гродно, Гомель ва Брест вилоятларига бириктирилади. Саноат ва аграр объектлар негизида янги ишлаб чиқаришларни ташкил этиш, тадбиркорлик лойиҳаларини жойлаштириш ҳамда аҳоли бандлигини таъминлаш бўйича алоҳида “йўл хариталари” тасдиқланади.

Ҳар бир ҳудуддан 30 нафардан етакчи тадбиркорни Беларусга олиб бориб, маҳаллий шериклар билан қўшма ташаббусларни бошлаш вазифаси қўйилди.

Ўзаро савдони жадаллаштириш ва юк ташиш харажатларини камайтириш мақсадида замонавий логистика инфратузилмасини барпо этиш масалалари ҳам кўриб чиқилди.

Йил якунига қадар “Беларусь темир йўллари” билан ҳамкорликда Витебск вилоятидаги Орша станциясида экспорт-импорт юклари учун мақбул тарифлар асосида хизмат кўрсатадиган интермодал логистика марказини ишга тушириш белгиланди.

Шунингдек, Беларусь компаниялари билан ҳамкорликда икки мамлакат ўртасида тўғридан-тўғри блок-поездлар қатновини йўлга қўйиш вазифаси қўйилди.

Фуқароларни ташкилий тартибда ишга жойлаштириш масаласига алоҳида эътибор қаратилди.

Биринчи босқичда Витебск ва бошқа ҳудудлардаги 13 та корхонага 1 минг 100 нафар Ўзбекистон фуқаросини танлов асосида ишга жойлаштириш режалаштирилган.

Сентябрь ойидан бошлаб ҳар ойда 500 нафардан, жами 5 минг нафар андижонликни Витебск вилоятида доимий иш билан таъминлаш кўзда тутилган. Бунинг учун Витебск шаҳрида Миграция агентлиги ваколатхонаси очилади.

Тадбиркорларга Беларусда ҳисобварақ очиш, устав фондига маблағ ўтказиш ва лойиҳаларига молиявий ресурслар олишда кўмаклашиш вазифаси қўйилди.

Витебскда замонавий сутчилик мажмуаси, ёғочни қайта ишлаш заводи ва логистика компаниясини ташкил этиш учун зарур маблағларни қулай шартларда ажратиш бўйича кўрсатмалар берилди.

Давлатимиз раҳбари ҳар бир келишув аниқ лойиҳа, янги корхона, қўшимча савдо ҳажми ва муносиб иш ўрнига айланиши шартлигини таъкидлади.

Мутасаддиларга эришилган натижаларни тизимли назорат қилиш ва “йўл хариталари” ижросини танқидий таҳлил қилиб бориш топширилди.