Саида Мирзиёева ҳайвонларга меҳр билан муносабатда бўлишга чақирди

Тошкент, Ўзбекистон (UzDaily.uz) — Ўзбекистон Президенти Администрацияси раҳбари Саида Мирзиёева ота-оналарни болаларда эрта ёшданоқ ҳайвонларга нисбатан ҳурмат ва меҳр-оқибат туйғусини шакллантиришга чақирди ҳамда уларга нисбатан шафқатсиз муносабат учун жавобгарлик кучайтирилганини эслатди.

Унинг таъкидлашича, 28 июндан мамлакатда қонунчиликка киритилган ўзгартишлар кучга кирган бўлиб, уларга мувофиқ ҳайвонларга нисбатан шафқатсиз муносабат учун белгиланган маъмурий жарималар икки баробар оширилган.

Шунингдек, бундай ҳуқуқбузарликлар учун 15 суткагача маъмурий қамоқ жазоси тайинланиши мумкин. Агар шундай ҳаракатлар такроран содир этилса, жиноий жавобгарлик, жумладан, озодликдан маҳрум қилиш жазоси ҳам қўлланилиши назарда тутилган.

Мирзиёеванинг сўзларига кўра, қонунчиликка киритилган ўзгартишлар нафақат айбдорларни жазолаш, балки жамият муҳим деб ҳисоблайдиган қадриятларни мустаҳкамлашга ҳам қаратилган.

«Жамиятимиз хавфсизлиги зўравонликка нисбатан муросасиз муносабатга бевосита боғлиқ. Ҳайвонларга нисбатан шафқатсизлик учун жазонинг кучайтирилиши ҳар қандай ҳаётга ҳурмат мутлақ меъёр ҳисобланадиган муҳитни шакллантиришга хизмат қилади», — деди у.

Президент Администрацияси раҳбари, шунингдек, бошқаларнинг ҳаётига ҳурмат оиладан бошланишини таъкидлади. Унинг фикрича, ота-оналар фарзандларига ожизларга озор бермасликни ва ҳақиқий куч ҳеч қачон шафқатсизлик орқали намоён бўлмаслигини ўргатиши лозим.

Саида Мирзиёева ўз мурожаатини Президент Администрациясининг мўйнали «ходимлари» — Ялпиз ва Дархон иштирок этган видеоролик билан бирга эълон қилди.