Қирғизистонда Ўзбекистон томонга олиб борувчи туннель аниқланди

Тошкент, Ўзбекистон (UzDaily.uz) — Қирғизистоннинг Боткен вилоятида ҳуқуқни муҳофаза қилувчи органлар дастлабки маълумотларга кўра, Қирғизистон–Ўзбекистон давлат чегараси орқали товарларни ноқонуний олиб ўтиш учун фойдаланилган бўлиши мумкин бўлган ерости туннелини аниқлади.

Боткен вилояти Ички ишлар бошқармаси маълум қилишича, экстремизм ва ноқонуний миграцияга қарши курашиш хизмати ходимлари чегара ҳудудида ерости йўлаги қурилаётгани ҳақида тезкор маълумот олган.

Текширув давомида Қадамжой тумани Исхоқ-Пўлатхон айил аймағининг Чечелик қишлоғида жойлашган ташландиқ уйдан Ўзбекистон ҳудуди томон олиб борувчи туннель аниқланган.

Ҳуқуқни муҳофаза қилувчи органлар маълумотларига кўра, ерости иншоотининг чуқурлиги тахминан 12 метр, кенглиги эса қарийб 1,5 метрни ташкил этади.

Ҳозирда терговга қадар текширув ўтказилмоқда. Тергов органлари воқеанинг барча ҳолатларини, шунингдек, туннелни қуриш ва ундан эҳтимолий фойдаланишга алоқадор шахсларни аниқламоқда.

Ҳуқуқни муҳофаза қилувчи органларнинг дастлабки версиясига кўра, ерости йўлагидан давлат чегараси орқали товарларни ноқонуний олиб ўтиш учун фойдаланилган бўлиши мумкин.