Қашқадарёлик фуқаро қуролли можарода қатнашгани учун судланди
Тошкент, Ўзбекистон (UzDaily.uz) — Яккабоғ туман жиноят ишлари бўйича суди Ўзбекистоннинг 31 ёшли фуқароси А. М.ни ёлланма жангчиликда айбдор деб топиб, уни уч йил муддатга озодликдан маҳрум қилди.
Иш материалларига кўра, эркак 2022 йил декабрь ойида ишлаш мақсадида Россияга кетган. Кейинчалик у гиёҳвандлик воситаларини сақлагани учун судланиб, 9 йил 6 ой муддатга озодликдан маҳрум этилган.
Судланувчининг айтишича, жазони ўташ даврида уни Россия ва Украина ўртасидаги жанговар ҳаракатларда иштирок этишга мажбурлашган, жазони ижро этиш муассасасида унга босим ўтказилган ва бир неча бор жарима изоляторига жойлаштирилган. Натижада у 2025 йил август ойида бир йиллик ҳарбий хизмат шартномасини имзолаган.
Унинг сўзларига кўра, шартномани имзолаганлиги учун унга 1,2 миллион рубль миқдорида бир марталик тўлов, ҳар ой 210 минг рубль миқдорида пул таъминоти, Россия фуқаролигини бериш ҳамда бир йиллик хизматдан кейин судланганликни бекор қилиш ваъда қилинган.
Жанговар ҳаракатларда иштирок этиш вақтида эркак оғир жароҳатлар олган. Парча тегиши оқибатида у чап кўзидаги кўриш қобилиятини йўқотган. Касалхонага юборилганидан сўнг у тиббиёт муассасасини тарк этиб, Москва шаҳридаги Ўзбекистон элчихонасига мурожаат қилган.
Ватанга қайтиш гувоҳномасини олгач, эркак Ўзбекистонга қайтган. Суд мажлиси давомида у айбини тўлиқ тан олган ва суддан жазони енгиллаштиришни сўраган.
Суд А. М.ни Ўзбекистон Республикаси Жиноят кодексининг 154-моддаси 1-қисми («Ёлланма жангчилик») билан айбдор деб топиб, унга уч йил муддатга озодликдан маҳрум қилиш жазосини тайинлади.
