Paynet GOINVEST’га 17,2 млрд сўм инвестиция қилади

Тошкент, Ўзбекистон (UzDaily.uz) — Paynet’нинг шўба компанияси FurtherIT инвестиция платформаси GOINVEST’га 17,2 млрд сўм инвестиция киритади ва компаниядаги улушини 51 фоизга етказишни режалаштирмоқда. Биринчи босқичда FurtherIT GOINVEST’нинг 33,14 фоиз улушини сотиб олди. Бу ҳақда KAP DEPO хабар берди.

Ушбу битим Paynet’нинг инвестиция йўналишини ривожлантириш доирасида амалга оширилади. У Paynet’нинг финтех инфратузилмаси ва фойдаланувчилар базасини GOINVEST ҳамда KAP DEPO’нинг капитал бозоридаги технологиялари ва экспертизаси билан бирлаштиришни назарда тутади.

Компаниялар Ўзбекистон аҳолисининг капитал бозорига рақамли кириш имкониятларини кенгайтириш, янги инвестиция маҳсулотларини ишга тушириш ва масофавий брокерлик хизматларини ривожлантиришни режалаштирмоқда.

Ҳамкорликнинг асосий йўналишларидан бири Ўзбекистондаги инвесторлар учун халқаро капитал бозорларига, жумладан, АҚШ фонд бозорига чиқиш имкониятини яратиш бўлади. Шунингдек, брокерлик ҳисобларини электрон ҳамёнлар орқали тўлдириш имкониятини жорий этиш ва GOINVEST инвестиция хизматларини Paynet экотизимига интеграция қилиш режалаштирилган.

GOINVEST асосчиси ва KAP DEPO бош директори Фаррух Хўжаев ушбу битимни компания ривожидаги муҳим босқич деб атади.

Унинг сўзларига кўра, ҳамкорларнинг салоҳиятини бирлаштириш рақамли инвестицияларни ривожлантиришни тезлаштириш ва фонд бозорини фуқаролар учун янада қулай қилиш имконини беради.

Битимни PwC компанияси кузатиб борди. У юридик ва консалтинг хизматлари бўйича қўллаб-қувватлади.