Тошкент, Ўзбекистон (UzDaily.uz) — Ижтимоий тармоқлар ва янгилик каналларида ноябрь ойининг биринчи ўн кунлигида кучли ёмғирлар ёғиши ҳақида тарқатилаётган хабарлар синоптиклар прогнозларига мос келмайди. Бу ҳақда Ўзгидромет маълум қилди.
Тарқатилаётган хабарларда идора ноябрь бошида кучли ёғингарчилик бўлишини прогноз қилгани айтилган. Ўзгидрометда таъкидланишича, куз мавсумига хос ёмғирлар ҳақиқатан ҳам кутилади.
Бироқ синоптиклар прогнозларига кўра, яқин кунларда ёғингарчилик кузатиладиган кунлар сони кам бўлиши кутилмоқда.
Идора текширилмаган маълумотларга ишонмасликка ва расмий манбаларга таянишга чақирди. Об-ҳавонинг долзарб прогнозлари Ўзгидрометнинг расмий ахборот ресурсларида эълон қилиб борилади.
