Ўзбекистонда солиқ тўловларини кечиктириш тартибини соддалаштириш таклиф этилмоқда

Тошкент, Ўзбекистон (UzDaily.uz) — Ўзбекистонда солиқларни тўлашни кечиктириш ва бўлиб-бўлиб тўлаш имкониятини олиш тартибини соддалаштириш таклиф этилмоқда. Қонун лойиҳасига кўра, бундай имкониятни солиқ тўловчининг молиявий ҳолати ва истисно ҳолатлар мавжудлигидан қатъи назар тақдим этиш режалаштирилмоқда. Бу ҳақда Адлия вазирлиги хабар берди.

Вазирлик «Тўловга қобилиятсизлик институтини такомиллаштириш муносабати билан ҳукуматнинг айрим қарорларига ўзгартириш ва қўшимчалар киритиш тўғрисида»ги қонун лойиҳасини жамоатчилик муҳокамасига қўйди.

Лойиҳада ваколатли орган солиқ тўловчининг молиявий ҳолати ва истисно ҳолатлар мавжудлигидан қатъи назар, солиқларни тўлашни кечиктириш ёки бўлиб-бўлиб тўлаш имкониятини тақдим этиши мумкинлиги назарда тутилмоқда.

Шунингдек, тегишли тартибни солиқ текширувлари натижаларига кўра қўшимча ҳисобланган солиқлар ва улар бўйича молиявий санкцияларга ҳам татбиқ этиш таклиф қилинмоқда.

Ўзгаришлар аризаларни топшириш тартибига ҳам тааллуқли бўлади. Солиқларни тўлашни кечиктириш ёки бўлиб-бўлиб тўлаш ҳақидаги мурожаатларни солиқ солиш объекти жойлашган ҳудуддаги туман ва шаҳар ҳокимликларига юбориш таклиф этилмоқда.

Аризани қоғоз ёки электрон шаклда топшириш мумкин бўлади. Электрон аризаларни солиқ органларининг электрон давлат хизматлари портали орқали қабул қилиш режалаштирилмоқда.

Бундан ташқари, қонун лойиҳасида солиқ тўловчининг мажбуриятларини таъминлашга қўйиладиган талабларни ўзгартириш назарда тутилган. Банк кафолати билан бир қаторда суғурта полисини тақдим этишга ҳам рухсат бериш таклиф қилинмоқда.

Қонун лойиҳаси бўйича жамоатчилик муҳокамаси 25 августга қадар давом этади.