Ўзбекистонда аҳоли зичлиги 85,8 кишига етди

Тошкент, Ўзбекистон (UzDaily.uz) — 2026 йил 1 июль ҳолатига Ўзбекистон аҳолисининг ўртача зичлиги бир квадрат километрга 85,8 кишини ташкил этди. Бир йил давомида мазкур кўрсаткич 1,5 кишига ошган. Бу ҳақда Миллий статистика қўмитаси хабар берди.

Мамлакатда аҳоли зичлиги сўнгги йилларда изчил ошиб бормоқда. 2022 йил 1 июль ҳолатига аҳоли зичлиги бир квадрат километрга 79,3 кишини ташкил этган бўлса, 2023 йилда бу кўрсаткич 81 кишига етган.

2024 йилда аҳоли зичлиги бир квадрат километрга 82,7 кишига ошган, 2025 йилда эса 84,3 кишини ташкил этган.

Шу тариқа, 2022 йилдан 2026 йилгача бўлган даврда Ўзбекистонда аҳолининг ўртача зичлиги бир квадрат километрга 6,5 кишига, яъни 79,3 кишидан 85,8 кишига ошган. Нисбий ҳисобда ўсиш қарийб 8,2 фоизни ташкил этган.

2025 йил билан таққослаганда эса аҳоли зичлиги бир квадрат километрга 1,5 кишига ёки қарийб 1,8 фоизга ошган.