Тошкент, Ўзбекистон (UzDaily.uz) — «Ўзчармсаноат» уюшмаси вакиллари Хитойнинг Гуанчжоу шаҳрида Guangzhou Footwear Association вакиллари билан музокаралар ўтказди.
Томонлар ишбилармонлик алоқаларини кенгайтириш, инвестициявий ҳамкорлик ва ўзбек чарм-пойабзал маҳсулотларини Хитой бозорида илгари суриш масалаларини муҳокама қилди. Бу ҳақда «Ўзчармсаноат» уюшмаси хабар берди.
Учрашув давомида қўшма инвестиция лойиҳаларини ишлаб чиқиш, ишлаб чиқариш қувватларини кенгайтириш ва соҳа корхоналарида замонавий технологияларни жорий этиш имкониятлари кўриб чиқилди.
Иштирокчилар Хитой дистрибьюторлари билан тўғридан-тўғри алоқалар ўрнатиш ва ўзбек маҳсулотлари учун янги экспорт йўналишларини ривожлантириш масалаларига ҳам алоҳида эътибор қаратдилар.
Шунингдек, томонлар узоқ муддатли шериклик истиқболлари, қўшма ишлаб чиқариш ва савдо ташаббусларини амалга ошириш масалаларини муҳокама қилдилар.
