Тошкент, Ўзбекистон (UzDaily.uz) — Ўзбекистон ва Исроил архив иши соҳасидаги ҳамкорликни кенгайтиришга келишиб олди. Тегишли ўзаро англашув меморандуми «Ўзархив» агентлиги ва Исроил Давлат архиви ўртасида Ўзбекистон Миллий архивида бўлиб ўтган маросимда имзоланди.
Ҳужжатни «Ўзархив» агентлиги директори Улуғбек Юсупов ва Исроил Давлат архивининг бош архивчиси, Исроил делегациясига раҳбарлик қилган Рут Аврамович имзолади.
Тадбирда Исроилнинг Ўзбекистондаги элчиси Гидеон Люстиг, шунингдек, икки мамлакат архив иши мутахассислари, олимлар ва жамоатчилик вакиллари иштирок этди.
Томонлар архив ҳужжатларини сақлаш, ўрганиш ва рақамлаштириш, тарихий ва маданий меросни муҳофаза қилиш, касбий тажриба алмашиш ҳамда қўшма илмий тадқиқотлар ўтказиш масалаларини муҳокама қилди. Архив муассасалари фаолиятига замонавий технологияларни жорий этишга ҳам алоҳида эътибор қаратилди.
Ушбу соҳадаги ҳамкорлик бир неча йилдан буён ривожланиб келмоқда. 2021 йилда Яҳудий халқи тарихи марказий архиви билан ҳамкорлик меморандуми, 2022 йилда эса «Яд Вашем» ёдгорлик мажмуаси билан ҳамкорлик тўғрисидаги битим имзоланган.
Маросимда сўзга чиққан Гидеон Люстиг Исроил ва Ўзбекистон ўртасидаги дўстона муносабатларнинг аҳамиятини қайд этиб, тарихий хотирани сақлашда илмий ва маданий ҳамкорлик муҳим ўрин тутишини таъкидлади.
Янги меморандум икки мамлакат архив муассасалари ўртасидаги алоқаларни мустаҳкамлаш, билим алмашиш, тарихий манбаларни ўрганиш ва қўшма тадқиқот лойиҳаларини амалга ошириш учун қўшимча имкониятлар яратишга қаратилган.
Ҳамкорлик, шунингдек, тадқиқотчилар ва кенг жамоатчиликнинг архив материалларидан фойдаланиш имкониятларини кенгайтиришни ҳам назарда тутади.
