Ўзбекистон судларда шикоятларни кўриб чиқиш тартибини мустаҳкамлади

Тошкент, Ўзбекистон (UzDaily.uz) — Ўзбекистонда фуқаролар ва тадбиркорларнинг иқтисодий ҳамда маъмурий судларга мурожаат қилиш тартибига оид қонунчиликка ўзгартишлар киритилди. Ўзбекистон Президенти Шавкат Мирзиёев тегишли қонунни имзолади. Хусусан, маъмурий органларнинг қарорлари, ҳаракатлари ёки ҳаракатсизлиги устидан берилган шикоятларни кўриб чиқишда мансабдор шахсларнинг иштирок этиши бўйича янги қоидалар белгиланди.

Маъмурий суд ишларини юритиш тўғрисидаги кодекс 148-1-модда билан тўлдирилди. Унда маъмурий орган мансабдор шахси ёки унинг вакили суд мажлисига келмаган тақдирда юзага келадиган ҳуқуқий оқибатлар белгиланган.

Янги нормага кўра, маъмурий органнинг қарори ёки унинг мансабдор шахсининг ҳаракати ёхуд ҳаракатсизлиги устидан берилган ариза ёки шикоят кўриб чиқилаётганда тегишли мансабдор шахс ёки унинг вакилининг суд мажлисида иштирок этиши мажбурий бўлади.

Агар мансабдор шахс ёки унинг вакили суд мажлисига келмаса, ишни кўриб чиқиш кейинга қолдирилиши керак. Бунда суд келмаслик сабабини узрли деб топмаса, мансабдор шахсга суд жаримаси қўллаши мумкин.

Шу билан бирга, қонунда истисно ҳам назарда тутилган. Агар суд мансабдор шахс ёки маъмурий орган вакилининг иштирокисиз ҳам ишни ҳар томонлама, тўлиқ ва тўғри ҳал қилиш мумкин, деган хулосага келса, иш уларнинг иштирокисиз кўриб чиқилиши мумкин.

Янги қоидалар маъмурий органларнинг қарорлари, шунингдек, уларнинг мансабдор шахслари ҳаракатлари ёки ҳаракатсизлиги устидан шикоят қилинадиган суд ишларига татбиқ этилади.