Туркиянинг Aksa Elektrik компанияси Самарқанд тармоқларини бошқаради

Тошкент, Ўзбекистон (UzDaily.uz) — Туркиянинг Aksa Elektrik (Акса Электрик) компанияси халқаро тендер якунларига кўра Самарқанд вилоятининг тақсимловчи электр тармоқларини бошқариш ҳуқуқини қўлга киритди. Бу Ўзбекистонда бундай инфратузилмани хусусий инвесторга уни ривожлантириш учун мажбурий капитал қўйилмалар киритиш шарти билан бошқарувга бериш бўйича биринчи ҳолат ҳисобланади. Бу ҳақда O'zbekiston 24 телеканали Aksa Elektrik бош директори Алпер Эрбаш билан интервьюга таяниб хабар берди.

Эрбашнинг сўзларига кўра, компания учун бу ғурур ва катта масъулиятни уйғунлаштирган янги босқич ҳисобланади. У президент ташаббуси билан Самарқанд вилоятида электр энергиясини тақсимлаш ҳуқуқининг берилишини катта шараф деб атади.

У кўрсатилган ишонч учун давлат органлари ва маҳаллий ҳамкорларга миннатдорлик билдириб, сўнгги йилларда Ўзбекистон энергетика соҳаси кенг кўламли трансформация жараёнидан ўтаётганини таъкидлади. Унинг айтишича, Президент Шавкат Мирзиёев раҳбарлигида амалга оширилаётган ислоҳотлар хусусий бизнес учун янги имкониятлар яратмоқда.

Aksa Elektrik раҳбари Ўзбекистон ва Туркия ўртасидаги кўп йиллик дўстлик ҳамда икки мамлакат раҳбарлари ўртасидаги яқин муносабатлар энергетика соҳасидаги ҳамкорлик учун асос бўлиб хизмат қилишини таъкидлади. Шунингдек, у компания барча лойиҳаларида маҳаллий мутахассислар ва ишлаб чиқарувчилар билан ҳамкорлик қилишга, маҳаллий иқтисодиёт ривожига ҳисса қўшишга катта аҳамият беришини билдирди.

Эрбашнинг аниқлик киритишича, Aksa Group гуруҳи 2020 йилдан буён Ўзбекистон энергетика соҳасини ривожлантиришда иштирок этиб келмоқда. Тошкент, Бухоро ва Толимаржондаги унинг электр станцияларининг умумий ўрнатилган қуввати 1 220 МВтни ташкил этади. Ишлаб чиқарилаётган электр энергияси мамлакат аҳолиси ва саноат корхоналарига етказиб берилмоқда.

Энди компания Aksa Elektrik орқали ушбу ишни давом эттириб, электр энергиясини тақсимлаш йўналишини ривожлантиради, тармоқларни модернизация қилади ҳамда ўз технологиялари ва тажрибаси ҳисобига тақсимловчи инфратузилмани мустаҳкамлайди.

Эрбаш, шунингдек, бугунги кунда энергетика ислоҳотларининг янги мезонлари нафақат ишлаб чиқарилган электр энергияси ҳажми, балки қанча энергияни тежаш ва йўқотишларнинг олдини олишга эришилгани, шунингдек, ресурслар қанчалик самарали бошқарилаётгани билан ҳам белгиланишини таъкидлади.

Унинг сўзларига кўра, электр ва газ таъминотининг келажаги ҳар бир хонадонда ҳисоблагич ўрнатишдан бошланади, энергетика соҳасининг барқарорлигини эса қувватларни оширишни ресурслардан тежамкор фойдаланиш билан уйғунлаштириш таъминлайди.

Аввалроқ Энергетика вазири Шерзод Хўжаев ёқилғи-энергетика комплекси масалалари бўйича Президент ҳузурида ўтказилган йиғилишда тақсимловчи тармоқларнинг барча маҳаллий ходимлари ўз иш жойларида қолишини маълум қилган эди. Хориждан фақат 15 нафар мутахассис жалб этилади.

Инвестор, шунингдек, ускуналарнинг камида 90 фоизини маҳаллий ишлаб чиқарувчилардан харид қилиш ҳамда икки йил муддатда банк кафолатлари асосида маҳаллаларда 400 та микролойиҳани амалга ошириш мажбуриятини олди.

Лойиҳа вазирликнинг кенгроқ тақдимотининг бир қисми бўлди. Унда, шунингдек, 14 та пилот ҳудудда маҳаллаларнинг энергетика паспортларини шакллантириш натижалари ва ўзбек компаниялари томонидан Афғонистонда электр тармоқларини қуриш масалалари муҳокама қилинди.