Тошкент, Ўзбекистон (UzDaily.uz) — Ўзбекистон Қишлоқ хўжалиги вазирлиги ишчи гуруҳи 14–17 сентябрь кунлари Польша пойтахти Варшава шаҳрида хизмат сафарида бўлди. Бу ҳақда Ўзбекистон Қишлоқ хўжалиги вазирлиги хабар берди.
Ташриф давомида ўзбек қишлоқ хўжалиги маҳсулотларини Европа бозорларига олиб чиқиш, савдо-логистика алоқаларини ривожлантириш ва икки томонлама ҳамкорликни кенгайтириш масалалари муҳокама қилинди.
Польша Қишлоқ хўжалиги ва Қишлоқ ҳудудларини ривожлантириш вазирлигида бўлиб ўтган учрашувда икки давлат ўртасидаги ҳамкорликнинг истиқболли йўналишлари кўриб чиқилди. Хусусан, қишлоқ хўжалиги маҳсулотлари ўзаро савдосини қўллаб-қувватлаш, қўшма логистика-савдо марказларини ташкил этиш ва илмий-тадқиқот муассасалари ўртасида тўғридан-тўғри ҳамкорликни йўлга қўйиш бўйича фикр алмашилди.
Ўзбекистон маҳсулотларини Польша бозорига етказиб бериш ва реализация қилиш имкониятларини ўрганиш мақсадида ишчи гуруҳ Варшавадаги йирик савдо-логистика мажмуаларига ташриф буюрди. Марказий ва Шарқий Европадаги қишлоқ хўжалиги маҳсулотларининг энг йирик улгуржи бозорларидан бири бўлган «Бронише» савдо маркази ҳамда «Прага Гельда» савдо мажмуаси раҳбарияти билан учрашувлар ўтказилди.
Музокаралар давомида Ўзбекистонда етиштирилган қишлоқ хўжалиги маҳсулотларини ушбу савдо мажмуалари орқали Польша бозорига олиб кириш ва тақсимлаш имкониятлари муҳокама қилинди. Мажмуалар раҳбарияти ўзбек маҳсулотларини бозорга олиб чиқишда амалий кўмак кўрсатишга тайёрлигини билдирди.
Польшада фаолият юритаётган тадбиркорлар билан учрашувда ўзбек тадбиркорлари маҳсулотлари савдосини кенгайтиришга хизмат қиладиган логистика марказини ташкил этиш масаласи кўриб чиқилди. Бу йўналишда Ўзбекистон Савдо-саноат палатаси иштирокида уч томонлама музокаралар ўтказиш бўйича келишувга эришилди.
Ҳамкорликнинг яна бир муҳим йўналиши кадрлар тайёрлаш ва амалий тажриба алмашиш бўлди. Шу мақсадда қишлоқ хўжалиги маҳсулотларини ишлаб чиқарувчи Green Crops компанияси вакили билан учрашув ўтказилиб, ўзбекистонлик талабалар учун стажировка дастурини кенгайтириш масалалари муҳокама қилинди.
Иш сафари давомида ишчи гуруҳ Ўзбекистоннинг Польшадаги элчихонаси томонидан мамлакат мустақиллигининг 35 йиллигига бағишлаб ташкил этилган конференцияда ҳам иштирок этди. Унда Ўзбекистонда амалга оширилаётган ислоҳотлар натижалари ва «Ўзбекистон — 2030» стратегиясининг устувор йўналишлари ҳақида маълумот берилди.
Ташрифнинг асосий йўналишларини Польша билан савдо-логистика ҳамкорлигини ривожлантириш, ўзбек маҳсулотлари учун янги бозор имкониятларини очиш ҳамда талабалар учун амалий тажриба алмашиш дастурларини кенгайтириш ташкил этди.
Ўтказилган учрашув ва музокаралар икки давлат ўртасидаги қишлоқ хўжалиги соҳасидаги алоқаларни янада мустаҳкамлашга қаратилди.
