Тошкент, Ўзбекистон (UzDaily.uz) — Ўзбекистон қишлоқ хўжалиги вазири ўринбосари Алишер Шукуров АҚШ Қишлоқ хўжалиги вазирлигининг Марказий Осиё бўйича минтақавий қишлоқ хўжалиги маслаҳатчиси Ришан Чаудхри билан учрашув ўтказди. Бу ҳақда Ўзбекистон Қишлоқ хўжалиги вазирлиги хабар берди.
Музокаралар давомида Ўзбекистон Республикаси Қишлоқ хўжалиги вазирлиги ва АҚШ Қишлоқ хўжалиги вазирлиги ўртасида икки томонлама ҳамкорликни ривожлантириш, идоралар ўртасида тўғридан-тўғри ишчи алоқаларни йўлга қўйиш ҳамда ўзаро манфаатли йўналишларда амалий ҳамкорликни кенгайтириш масалалари муҳокама қилинди.
Қишлоқ хўжалиги маҳсулотлари савдосини кенгайтириш ва аграр соҳада ўзаро манфаатли савдо-иқтисодий ҳамкорликни ривожлантириш масалаларига алоҳида эътибор қаратилди.
Шунингдек, Калифорния ва Техас штатларининг қишлоқ хўжалигини ривожлантириш борасидаги илғор тажрибасини ўрганиш, ушбу штатларда етиштириладиган асосий қишлоқ хўжалиги экинлари, замонавий ишлаб чиқариш технологиялари, сув ресурсларидан самарали фойдаланиш ва юқори ҳосилдорликка эришиш масалалари муҳокама қилинди. Шу билан бирга, мазкур тажриба ва ёндашувларни Ўзбекистон шароитида қўллаш имкониятлари кўриб чиқилди.
Учрашувда аграр таълим ва илм-фан соҳасидаги ҳамкорликни ривожлантириш масалалари ҳам муҳокама қилинди. Хусусан, Ўзбекистон ва АҚШнинг етакчи аграр университетлари ҳамда илмий-тадқиқот муассасалари ўртасидаги алоқаларни кенгайтириш, мутахассислар ва ёш кадрлар учун тажриба алмашиш ва малака оширишни ташкил этиш истиқболлари кўриб чиқилди.
Учрашув якунида томонлар мунтазам мулоқотни давом эттириш, белгиланган йўналишлар бўйича ҳамкорликнинг аниқ ташаббусларини ишлаб чиқиш ҳамда амалий алоқаларни янада кенгайтириш бўйича ишларни давом эттиришга келишиб олди.
