Тошкент, Ўзбекистон (UzDaily.uz) — Ўзбекистон Футбол ассоциацияси (ЎФА) Халқаро футбол федерацияси (ФИФА) президенти Жанни Инфантинони тўлиқ қўллаб-қувватлашини ва ташкилот билан яқин ҳамкорликни давом эттириш ниятида эканини маълум қилди.
Бу баёнот Жанни Инфантинонинг Ўзбекистонга ташрифи доирасида янгради. ФИФА президенти Тошкентда футбол инфратузилмаси соҳасида амалга оширилаётган лойиҳалар, жумладан, «Янги Тошкент» ҳудудида янги стадион қурилиши билан танишди.
Инфантино стадион қурилишининг бориши, унинг инфратузилмаси ҳамда Ўзбекистонда ФИФА U-20 Жаҳон чемпионатини ўтказиш учун яратилаётган шароитлар ҳақида маълумот олди.
ФИФА президенти, шунингдек, Ўзбекистон миллий терма жамоаси билан учрашди. Томонлар ўзбек футболидаги жорий ҳолат ва уни ривожлантириш истиқболлари, шунингдек, терма жамоанинг халқаро мусобақалардаги иштироки масалаларини муҳокама қилди.
ЎФА президенти билан учрашувда Жанни Инфантино ФИФА билан ҳамкорлик, футбол инфратузилмасини ривожлантириш, ёшлар футболига кўмаклашиш ҳамда ўзбек футболини халқаро майдонда янада илгари суриш масалаларини муҳокама қилди.
Ташриф доирасида ФИФА раҳбари Тошкентдаги 90-сонли умумтаълим мактабида янги футбол майдонининг очилиш маросимида ҳам иштирок этди. Лойиҳа ёшлар ўртасида оммавий спортни ривожлантириш ва футбол билан шуғулланиш учун замонавий шароитлар яратишга қаратилган.
ЎФА ФИФА ва Жанни Инфантинони тўлиқ қўллаб-қувватлашини ҳамда халқаро федерация билан яқин ҳамкорликни давом эттиришини таъкидлади.
