Тошкент, Ўзбекистон (UzDaily.uz) — Ўзбекистон эркаклар терма жамоаси Самарқандда ўтаётган 46-Бутунжаҳон шахмат олимпиадасининг бешинчи турида Венгрия терма жамоасини 4:0 ҳисобида мағлуб этиб, 100 фоизлик натижасини сақлаб қолди.
Барча тўртта тахтада Нодирбек Абдусатторов, Жавоҳир Синдоров, Нодирбек Ёқуббоев ва Шамсиддин Воҳидов ғалаба қозонди.
Ўзбекистон аёллар терма жамоаси бешинчи турда турнир фаворитларидан бири бўлган АҚШ терма жамоаси билан дуранг ўйнади. Афруза Ҳамдамова ғалаба қозонди, Умида Омонова ва Нилуфархон Имомқўзиева ўз партияларини дуранг билан якунлади. Гулруҳбегим Тоҳиржонова тенг вазиятда хатога йўл қўйиб, рақибасига мағлуб бўлди. Натижада учрашув 2:2 ҳисобида якунланди.
Ўзбекистоннинг қўшимча терма жамоалари ўртасида эркаклар жамоаси Ўзбекистон-2 Филиппинни мағлуб этди, Ўзбекистон-3 эса Австрия билан дуранг ўйнади. Аёллар турнирида Ўзбекистон-2 Тунисни, Ўзбекистон-3 эса Мадагаскарни мағлуб этди.
Бешинчи турдан сўнг Ўзбекистоннинг асосий эркаклар терма жамоаси очиқ турнирда пешқадамлик қилмоқда. Иккинчи ўринни Ҳиндистон эгаллаб турибди.
Ўзбекистон аёллар терма жамоаси олтинчи ўринда бормоқда.
Олтинчи турда Ўзбекистон эркаклар терма жамоаси Ҳиндистонга қарши баҳс олиб боради. Ҳар икки жамоа ҳам турнир етакчилари қаторида бораётгани сабабли, уларнинг ўзаро учрашуви олимпиаданинг марказий баҳсларидан бири бўлади.
Ўзбекистон аёллар терма жамоаси олтинчи турда Грузия билан ўйнайди. Очиқ турнирда Ўзбекистон-2 Испанияга, Ўзбекистон-3 эса Австралияга қарши баҳс олиб боради. Аёллар турнирида Ўзбекистон-2 Шимолий Македония билан, Ўзбекистон-3 эса Швеция билан ўйнайди.
46-Бутунжаҳон шахмат олимпиадаси 2026 йил 15–27 сентябрь кунлари Самарқандда бўлиб ўтмоқда.
