Тошкент, Ўзбекистон (UzDaily.uz) — Ўзбекистон вакили Мария Тимофеева Пекин шаҳрида ўтказилаётган WTA 1000 тоифасидаги China Open турнирининг дастлабки босқичидан муваффақиятли ўтди.
Биринчи даврада Тимофеева жаҳон рейтингида 88-ўринда турган чехиялик Дарья Видмановага қарши баҳс олиб борди. Ўзбекистонлик теннисчи учрашувда икки сетда 6:3, 6:3 ҳисобида ғалаба қозониб, иккинчи даврага йўлланма олди.
Кейинги учрашувда Тимофеева турнирда 12-рақамли сеед сифатида қайд этилган япониялик Наоми Осакага қарши майдонга тушади. Осака «Катта дубулға» турнирларининг тўрт карра ғолиби ҳисобланади ва фаолияти давомида жаҳон рейтингида биринчи ўринни эгаллаган. 2019 йилда япониялик теннисчи China Open турнирида ғолиб бўлган.
Тимофеевадан ташқари, Пекиндаги турнирда Ўзбекистон номидан Камилла Раҳимова ва Полина Кудерметова ҳам иштирок этмоқда.
