Тошкент, Ўзбекистон (UzDaily.uz) — Президент ҳузуридаги Тадбиркорларнинг ҳуқуқлари ва қонуний манфаатларини ҳимоя қилиш бўйича вакил аппарати Тошкентдаги компанияга нисбатан қўлланилган жаримани бекор қилишга эришди. Бу ҳақда идора матбуот хизмати хабар берди.
Компания раҳбари P.P. чиқиндилар билан муомала қилиш қоидаларини бузганлик учун унга жарима қўлланилганидан сўнг бизнес-омбудсманга мурожаат қилган.
Бунга Миллий гвардия ходимининг қарори сабаб бўлган. У компания ходимлари Юнусобод туманидаги дорихона ёнида ахлат ташлаган, деб ҳисоблаган. Бироқ чиқиндилар бўлган ҳудуд компанияга тегишли бўлмаган.
Тадбиркор ўзаро ҳамкорликни бошлашдан олдин мазкур мулоқотни «Бизнес-ҳимоя» QR-коди ёрдамида «Ягона давлат назорати» тизимида рўйхатдан ўтказишни талаб қилган. Бироқ Миллий гвардия ходими бу талабни инобатга олмаган.
Шунга қарамай, у компания раҳбарига нисбатан Маъмурий жавобгарлик тўғрисидаги кодекснинг чиқиндиларни белгиланмаган жойга ташлаганлик учун жавобгарликни назарда тутувчи 91−1-моддаси бўйича баённома расмийлаштирган. Тадбиркорга 20,6 миллион сўм миқдорида жарима тайинланган.
Бизнес-омбудсман аппарати давлат хизматчилари бизнес вакиллари билан бўлган барча алоқаларни, жумладан, расмий текширув ўтказиш билан боғлиқ бўлмаган мулоқотларни ҳам «Ягона давлат назорати» тизимида рўйхатдан ўтказиши шартлигини эслатди.
Тегишли тартиб жорий йил апрель ойида Президент фармони билан белгиланган.
Аниқланган қоидабузарликларни бартараф этиш мақсадида бизнес-омбудсман Тошкент шаҳар Миллий гвардия бошқармасига тақдимнома киритди.
Хизмат текшируви натижасида тадбиркорга қўлланилган жарима бекор қилинди. Қоидабузарликка йўл қўйган ходим интизомий жавобгарликка тортилди.
