Тошкент, Ўзбекистон (UzDaily.uz) — Ўзбекистон янги лойиҳаларни малакали мутахассислар билан таъминлаш мақсадида энергетика соҳасидаги техникумларни инвесторлар бошқарувига беришга тайёр. Бу ҳақда Президент Шавкат Мирзиёев 16 октябрь куни ёқилғи-энергетика соҳаси инвесторлари билан очиқ мулоқотда маълум қилди.
Давлат раҳбари бунга мисол сифатида Саудия Арабистонининг Acwa компаниясини келтирди. Компания Қорақалпоғистон, Бухоро ва Сирдарё вилоятларидаги техникумларни замонавий ускуналар билан жиҳозламоқда. Шунингдек, у энергетиканинг янги йўналишлари бўйича ҳар йили юзлаб ёшларни ўқитишни бошламоқда.
Мирзиёев бошқа инвесторларни ҳам халқаро талаблар ва ўз лойиҳаларининг кадрларга бўлган эҳтиёжини ҳисобга олган ҳолда мутахассислар тайёрлаш жараёнида фаолроқ иштирок этишга чақирди. Бундай ташаббусларни амалга ошириш учун давлат таълим муассасаларини хусусий компаниялар бошқарувига беришга тайёр.
Келгуси ўқув йилидан бошлаб Ўзбекистон олий таълим муассасаларида энергетика йўналишлари бўйича қабул квоталарини ошириш режалаштирилмоқда. Бундан ташқари, ҳар йили иқтидорли 50 нафар ёшнинг дунёнинг етакчи университетларида таҳсил олиши учун давлат грантлари ажратилади.
EDF компаниясининг ижрочи вице-президенти Седрик Лебуш энергетика соҳаси учун мутахассислар тайёрлаш бўйича компаниянинг қўшма лойиҳалари мавжудлигини ва бу йўналишни ривожлантиришга тайёрлигини маълум қилди.
Acwa компанияси бошқаруви раиси Муҳаммад Абунайян ҳам компаниянинг янги лойиҳалари доирасида ёшларни замонавий касбларда ишлашга тайёрлаш муҳимлигини таъкидлади.
Ўзбекистон 2030 йилгача янги электр энергияси ишлаб чиқариш қувватларини 22 минг МВтга етказишни режалаштирмоқда. Бу эса ривожланаётган энергетика соҳаси учун малакали мутахассислар тайёрлашни талаб қилади.
