Тошкент, Ўзбекистон (UzDaily.uz) — Фарғона вилояти ва Бошқирдистон Республикаси янги қўшма лойиҳаларни амалга ошириш ҳамда минтақалараро ҳамкорликни янада ривожлантириш бўйича келишувга эришди.
Фарғона вилояти ҳокими Хайрулло Бозоров «Фарғона Экспо» марказида Бошқирдистон Республикасининг ташқи иқтисодий алоқалар ва конгресс фаолияти вазири Маргарита Болычева билан учрашди. Учрашув Ўзбекистон ва Россия ҳудудлари кенгашининг III йиғилиши доирасида бўлиб ўтди.
Томонлар савдо-иқтисодий алоқаларни кенгайтириш, саноат кооперациясини ва технологик ҳамкорликни ривожлантириш истиқболларини кўриб чиқди. Қишлоқ хўжалиги соҳасидаги қўшма лойиҳаларга алоҳида эътибор қаратилди.
Хусусан, учрашув иштирокчилари Бошқирдистонда фермер хўжаликлари учун ажратилаётган ер участкаларидан самарали фойдаланиш, шунингдек, фарғоналик тадбиркорларнинг республикада ташкил этилаётган технопарк ҳудудида ишлаб чиқариш корхоналарини ташкил этиши учун имкониятлар яратиш масалаларини муҳокама қилди.
Ҳамкорликнинг яна бир йўналиши электрон савдо платформаларини ўзаро интеграция қилиш бўлиши мумкин.
Томонлар баҳосига кўра, ушбу йўналишларни ривожлантириш икки ҳудуд тадбиркорлари ўртасидаги тўғридан-тўғри алоқаларни кенгайтириш ва янги бозорларга чиқиш учун қўшимча имкониятлар яратишга хизмат қилади.
Янги лойиҳаларни илгари суриш мақсадида делегациялар алмашинуви бўйича чора-тадбирлар келишиб олинди.
Иқтисодий ҳамкорликдан ташқари, учрашув иштирокчилари Ўзбекистон ва Россия халқлари ўртасидаги дўстона муносабатларни янада ривожлантириш масалаларини ҳам муҳокама қилди.
