Ўзбекистон банкларида чакана кредитлар улуши 37 фоизга етди

Тошкент, Ўзбекистон (UzDaily.uz) — 2026 йил 1 июнь ҳолатига кўра, Ўзбекистон банк тизимининг жами кредит портфели 636 трлн сўмга етди. Бу ўтган йилнинг мос даврига нисбатан 12 фоизга кўпдир. Шу билан бирга, жисмоний шахсларга ажратилган кредитлар улуши 34 фоиздан 37 фоизгача ошди, бу эса чакана кредитлашнинг аҳамияти ортиб бораётганини кўрсатади.

Аҳолига берилган кредитлар ҳажми 232,9 трлн сўмни ташкил этди. Айни пайтда энг йирик кредитлаш йўналиши ҳамон саноат соҳаси бўлиб қолмоқда. Ушбу тармоқ ҳиссасига 139,5 трлн сўм тўғри келади. Бироқ унинг умумий кредит портфелидаги улуши бир йил ичида 28 фоиздан 22 фоизгача камайди.

Қишлоқ хўжалигидаги кредит портфели 67,2 трлн сўмга етди, бу умумий ҳажмнинг 11 фоизига тенг. Савдо ва хизматлар соҳаси ҳиссасига 53,2 трлн сўм ёки портфелнинг 8 фоизи, транспорт ва коммуникациялар соҳасига эса 34,4 трлн сўм ёки 5 фоиз тўғри келади.

Тармоқлар орасида энг юқори ўсиш суръати қурилиш соҳасида қайд этилди. Мазкур йўналишда кредитлаш ҳажми ўтган йилнинг мос даврига нисбатан 48 фоизга ошиб, 21,6 трлн сўмга етди.