Ўзбекистонга заргарлик буюмларини ноқонуний олиб кириш тўхтатилди

Тошкент, Ўзбекистон (UzDaily.uz) — Бухоро вилоятида божхона ходимлари Олот ва Бухоро аэропорти чегара ўтказиш пунктлари орқали заргарлик буюмларини ноқонуний олиб киришга уринишнинг икки ҳолатни тўхтатдилар.

Жумладан, «Олот» чегара божхона пости орқали “Туркманистон – Ўзбекистон” йўналишида пиёда кириб келган фуқаро белгиланган тартибда божхона назоратидан ўтказилди. Унинг хатти-ҳаракатлари божхона ходимларида шубҳа уйғотгани боис фуқаро чуқурлаштирилган кўрикка йўналтирилди. Замонавий сканер қурилмаси орқали ўтказилган текширув давомида рентген тасвирлари асосида фуқаро томонидан 310 грамм оғирликдаги қимматбаҳо заргарлик буюмлари яширинча олиб ўтилаётгани аниқланди.

Шунингдек, “Бухоро аэропорти” чегара божхона пости орқали “Туркия – Бухоро” йўналишида келган яна бир фуқаро ҳам божхона назоратидан ўтказилди. Текширув натижасида унинг юклари орасида божсиз олиб кириш меъёрларидан ортиқча бўлган 108,3 грамм қимматбаҳо заргарлик буюмлари мавжудлиги оз тасдигини топди.

Ҳозирда ҳар икки ҳолат бўйича умумий қиймати 501 миллион сўмдан ортиқ бўлган заргарлик буюмлари вақтинча сақловга олиниб, мазкур ҳолатлар юзасидан божхона органлари томонидан терговга қадар текширув ҳаракатлари олиб борилмоқда.