Тошкент, Ўзбекистон (UzDaily.uz) — 2026 йил 1 ноябрь ҳолатига кўра, Ўзбекистонда акциядорлар Марказий депозитарий орқали 7,8 трлн сўмдан ортиқ дивиденд олди.
Бу ўтган йилнинг мос давридаги кўрсаткичдан олти баробардан зиёд кўп. Бир йил давомида акциядорлар сони 10,8 фоизга ўсиб, 1 млн 122 минг нафардан ошди. Бу ҳақда Истиқболли лойиҳалар миллий агентлиги хабар берди.
Акциядорларнинг мутлақ кўпчилигини жисмоний шахслар ташкил этади — уларнинг сони 1 млн 56 минг нафарга етган. Йил бошидан буён уларнинг сони 108 минг нафардан зиёдга кўпайган. Облигация эгалари сони эса 1,8 баробарга ошиб, 4 минг нафардан ошди.
1 ноябрь ҳолатига кўра, корпоратив облигациялар чиқариш ҳажми 8,2 трлн сўмдан ошиб, 2,6 баробарга кўпайди. Қимматли қоғозлар бозорида илк бор 200,9 млрд сўмлик ипотека облигациялари чиқарилди. Бундан ташқари, умумий қиймати 100 млн доллар бўлган бешта валюта облигациялари чиқарилиши рўйхатдан ўтказилди.
2026 йилнинг ўн ойи давомида «Тошкент» Республика фонд биржасида қимматли қоғозлар билан савдолар ҳажми 16,6 трлн сўмни ташкил этди. Тузилган битимлар сони 2,8 баробарга ошиб, қарийб 1,1 млн тага етди. Корпоратив облигациялар савдоси ҳажми 6,1 трлн сўмни ташкил қилиб, саккиз баробардан зиёд ошди.
Инвесторлар ҳуқуқларини ҳимоя қилиш соҳасида судлар ўн ой давомида инвесторлар фойдасига 19,1 млрд сўм дивиденд ундириш тўғрисида қарорлар қабул қилди. Бу сумма икки баробарга кўпайди. Киритилган 14 та даъводан 13 таси тўлиқ қаноатлантирилди. 71 та маъмурий баённоманинг 67 таси бўйича суд қарорлари чиқарилди. Бозор иштирокчиларига бажарилиши мажбурий бўлган 200 дан ортиқ кўрсатма юборилди.
Лицензиялаш соҳасида ҳисобот даврида инвестиция воситачиси фаолияти учун бешта ва инвестиция активларини ишончли бошқарувчи фаолияти учун иккита лицензия берилди.
Инвестиция маслаҳатчиси фаолиятини амалга ошириш учун учта хабардор қилиш хусусиятига эга ҳужжат расмийлаштирилди. Лицензия эгаларининг ташаббуси билан ўнта лицензия бекор қилинди, яна битта лицензиянинг амал қилиши олти ой муддатга тўхтатиб турилди.
Ўн ой давомида агентликка инвесторлардан 358 та мурожаат келиб тушди. Ўтган йилнинг мос даврида бу кўрсаткич 585 тани ташкил этган. Мурожаатларнинг 249 таси жисмоний шахслар, 109 таси юридик шахслар томонидан юборилган. Шундан 348 та мурожаат кўриб чиқилди, қолган ўнтаси ўрганилмоқда.
